Siklista nga nag-viral nangayo’g pasaylo

NIPAKITA sa buhatan sa mayor sa Lapu-Lapu City kadtong siklista nga nag-viral ang video kay naghimo og delikado nga biking stunt sa Barangay Marigondon, Lapu-Lapu City. 

Giangkon sa batan-on nga resulta kadto sa hagit-hagit sa iyang mga barkada nga siklista usab.

Subay niini, giawhag ni Congressman-elect Junard ‘Ahong’ Chan ang mga siklista nga magsul-ob og helmet ug mogamit og reflective lights inig gabii aron masiguro ang ilang kaluwasan sa karsada.

Kining pamahayag ni Chan niadtong Miyerkules, Hunyo 18, 2025, gihimo human sa nag-viral nga video sa usa ka batan-ong siklista nga walay pagpakabana nga nipadagan sa iyang mountain bike  nga nisugat sa trak sa pikas lane. 

Kini nga gihimo sa biker nakamugna og dakong kabalaka bahin sa kaluwasan sa kadalanan sa mga motorista.

Human sa insidente, si Logan (dili tinuod niyang ngalan), nga nahimong sentro sa kontrobersiya, nisurender sa Office of the City Mayor sa Lapu-Lapu City Hall niadtong Miyerkules sa buntag.

Giangkon sa 18-anyos nga gipugos siya sa iyang mga barkada, lakip ang tulo ka higala gikan sa Sugbo ug Lapu-Lapu, sa paghimo sa stunt. 

Dugang niya nga bisan og lima na siya ka tuig nga nagsikad, sa 2025 pa siya nakasuway og himo og ingon niadto ka risgo.

Giangkon sab ni Logan nga ikaduha na kadto niyang paghimo sa maong stunt sa samang lugar.

Ang una naglambigit og usa ka modernong public utility vehicle niadtong Pebrero o Marso.

Usa ka guardian nga nikuyog kaniya kinsa niingon nga wala masayod ang pamilya ni Logan sa iyang mga binuhatan gawas sa ilang balay apan kanunay nga gipahimangnuan.

NAG-SORRY 

“Nangayo ko og pasaylo sa akong nabuhat ug mosaad ko nga dili na ni balikon. Sa tanang bikers, palihug ayaw ko sunda kay delikado,” matod ni Logan.

Bisan taga Cordova ang tin-edyer, nakapabalaka kini kang Chan tungod kay delikado kini sa kaluwasan sa publiko. 

Gitumbok sa mayor nga maayong ehersisyo ang pagbisikleta apan kinahanglan kining himuon sa luwas nga paagi ug sa insaktong lugar.

Walay pormal nga kaso ang ipasaka batok sa batan-on, apan nipasidaan si Chan nga kon dunay mosunod ni Logan, moresulta kini sa legal nga silot.

Aron mapahimanguan, nihangyo si Chan nga makigkita sa mga barkada ni Logan, ang uban 12 ngadto sa 13-anyos pa lang, aron dasigon sila nga dili mosunod sa susama ka risgo nga pagbisiklita.

Gipasabot sab sa mayor nga bisan sa nagkagrabe nga trapik sa Lapu-Lapu City, anaa gihapon ang bike lane alang sa mga siklista.

“Makita nato gamay kaayo atong karsada and nagkadaghan ang sakyanan ang ato lang siguro kon maabot ang panahon nga traffic pwedi ra man gyud ang bike makalusot-lusot comparing to sakyanan, mas dali sila maabot,” matod ni Chan.

Dugang niya, importante ang estriktong pagsunod sa mga lagda ug sa mandatory nga paggamit sa mga helmet ug reflector, ilabi na sa pagbisikleta panahon sa kagabhion aron malikayan ang mga aksidente. / DPC