Nabalhog sa bilanggoan ang upat ka mga lalaki nga gipasanginglan nga nitabang og lugos sa usa ka 15-anyos nga babaye sa Barangay Abugon, Sibonga, Sugbo, niadtong Miyerkules, Oktubre 30, 2024.
Sa imbestigasyon sa Sibonga police nga ang biktima usa ka dalagita nga taga Brgy. Lagang, Carcar City, Sugbo, samtang ang mga suspek nag-edad og 22, 23, 29, ug 39 anyos.
Ang usa ka suspek nga 22 anyos, delivery boy nga taga Cambuntan, Carcar City, nagkanayon nga iyang nailaila ang biktima pinaagi sa chat ug gani nagka-meet up na silang duha sa miaging buwan ug aduna nay nahitabo tali nila bisan nga dili sila official nga manag-uyab.
Niadtong Miyerkules, giingong nagsabot na sab sila nga magkita ug mag-abot sa abandunadong balay sa Abugon, Sibonga.
Sigon pa sa suspek nga sa maong lugar, nag-inom sila uban ang iyang mga higala nga niapas. Sila nangankon nga sinabutan ang maong nahitabo tali sa maong babaye.
Sa imbestigasyon, miangkon ang tulo ka mga suspek nga nakahilabot sa babaye samtang ang 39-anyos mihimakak sa akusasyon nga siya miapil sa maong binuhatan.
Padayon karon ang imbestigasyon sa kapulisan aron makumpleto ang mga ebidensya ug masiguro nga makab-ot ang hustisya alang sa biktima. / DVG