Gituohan nga wa nay kinabuhi ang security guard sa usa ka subdivision sa Lungsod sa Liloan, Lalawigan sa Sugbo sa dihang napalgan nga nahay-ad sa pathway, alas 6 sa buntag, Sabado, Oktubre 12, 2024.
Posible nga nag-roving si Paquito Broñola, 52 nga taga Poblacion Oriental, Lungsod sa Consolacion, Cebu atol sa insidente.
Nabantayan nalang nga diha na sa agianan sa usa ka residential ug resort complex sa Liloan nga nahay-ad si Broñola.
Base sa inisyal nga imbestigasyon sa Liloan Police Station nga adunay nakabantay nga nawad-an sa balanse ang maong sikyu ug gituohan nga giatake.
Ang kabanay sa namatay konbinsido nga natural cause ang hinungdan sa kamatayon ni Broñola ug wa nalang nila ipadala sa tambalanan aron nga opisyal nga madeklarar kon nakabsan kini sa iyang kinabuhi.
Buot sa pamilya nga madala ang lawas sa Lungsod sa Daanbantayan aron kahatagan og desente nga lubong. / DVG