Patay ang security guard human naligsan sa usa ka private van ug ang iyang kauban nga nagmaneho sa motorsiklo grabe sa aksidenti nga nahitabo sa alas 4:45 sa hapon naidtong Dominggo, April 20, 2025, sa Brgy. Mangga, Lungsod sa Tuburan.
Una niini, usa ka tricycle nga gimaneho ni Jojie Julapon Montebon, 57, minyo, ug nagpuyo sa nahisgutang lugar nagbiyahe paingon sa norte nga bahin.
Nagsunod kaniya ang usa ka Yamaha MT 15 nga gimaneho ni Rodil Parot Labangon, 27, ulitawo, electrician, ug taga Barangay Cogon, Tuburan samtang angkas ang iyang higala si Darwin Senillo Aspacio, 22, security guard, ug nadestino sa Mandaue City, lumad nga taga Barangay Guihop, Launsod sa La Libertad, Negros Oriental.
Sa imbestigasyon sa Tuburan Police Station ang mga biktima gikan sa buwangan ug nakainom padulong nga mopauli sa ilang panimalay apan pag-abot sa nahitaboan, ni-overtake sa tricycle.
Samtang nasulod sa pikas lane, akto nga gikasugat ang usa ka Toyota Hi-Ace Grandia van ug tungod niini, nibalik sa iyang lane ang motorsiklo.
Apan akto sab nga aksidenti nga naigo sa handlebar sa tricycle ang motorsiklo hinungdan nga natumba kini.
Gumikan niini, ang drayber sa motorsiklo ug ang angkas nangalagpot sa sementadong karsada.
Pero ang angkas nga si Aspacio nalatayan sa Toyota Hi-Ace Van, kasang pangalan sa drayber niini wala matala sa blotter sa kapulisan
Gidali sa pagdala sa Tuburan District Hospital ang mga biktima apan si Aspacio gideklarar nga dead-on-arrival (DOA).
Samtang ang drayber sa motorsiklo nakaangkon og seryuso nga kadaot gidala sa Balamban Provincilal Hospital.
Ang tricycle driver nakaangkon sab o minor injury.
Ang drayber sa van gikustodiya sa kapulisan apan gi-release siya sanglit nagkasabot sa kabanay sa mga biktima nga abagahon ang gastuhan sa ospital ug pagpahiluna aa namatay. / GPL