Gipaubos sa hospital arrest ang guwardiya sa usa ka hotel sa uptown area sa Dakbayan sa Sugbo sa dihang napusilan sa iyang paa sa nirespondi nga polis kay gialarma nga nag-wild ug ang giingong suway nga nitulis.
Ang insedente nahitabo niadtong kadlawon, Martes, Abril 8, 2025, ug nahitabo ang ginukdanay nga naabot sa Osmeña Boulevard.
Ang suspek giila nga si Vernor Patria, 28, kinsa niadto lang Marso 20, 2025, nagsugod sa iyang trabaho sa hotel sa Don Julio Llorente St., Cebu City.
Sa imbestigasyon sa Cebu City Police Office dunay nanawag sa elevated police outpost sa Mango nga dunay ongoing nga tulis ug gipahibawo dayon ang Abellana Police Station labot sa maong insidente sa sulod sa hotel.
Dali nga niresponde sa robbery alarm ang mga sakop sa Special Weapons and Tactics ug Motor Rider Unit ug ilang naabtan ang suspek sa maong hotel nga paingon na nga mosibat.
Nahitabo ang ginukdanay paingon sa Kapitolyo apan na-corner sa kapulisan ug gitambagan sa pagtahan sa iyang kaugalingon.
Inay nga mopatuo sa awhag sa polis nga mo-surrender, nihana na hinuon siya sa pagdunggab sa polis nga diha sa iyang duol hinungdan nga gi-neutralize ug napusilan sa tuo nga bahin sa iyang paa.
Si Patria gireklamo sa iyang kauban sa dihang gikan pa siya nanihapon ug nag-cigarette break sa iyang pagbalik sa hotel daw kalit nausab nilihokan ug nabuak niya ang glass door sa maong establisemeto sa dihang gilamba sa pag-abli.
Ang staff diha sa front desk suway nga nitawag sa ilang laing kauban aron sa pagbadlong ni Patria sa iyang gihimo apan gibunlot sa suspek ang maong staff ug gibirabira samtang gabitbit og gunting ug table knife nga maoy iyang gigamit nga pagpanghudlat.
Matod ni Police Colonel Enrico Figueroa ang hepe sa kapulisan sa Dakbayan sa Sugbo nga sakto lang ang gihimo sa iyang polis basi sa mikapat nga video nga samtang gibadlong ang suspek, miatake na hinuon ug mihana sa pagdunggab sa dala niini nga gunting ug kutsilyo.
“Makikita natin na umaatras ang police natin, binibigyan sya ng chance na sumuko sya at itapon ang kanyang patalim but instead nagpatuloy sya , so nakita ng police natin na may eminent danger na so kailangan i defend yung sarili nyq, syempre trained yung ating pulis instead sa body sya barilin ni neutralize lang sya duon sa kanyang paa tinamaan,” matod ni Figueroa.
Dugang ni Figueroa nga dako og natabang ang gipamutang nga mga elevated police outpost sa kadalanan sanglit sila ang dali nga duolon kon adunay krimen sa palibot niini.
Nagpadayon pa ang imbestigasyon kon unsay nakaingon nga naghurementado si Patria.
Lakip nga sutaon kon wala ba magumon ginadiling drugas ang suspek. / AYB