Subsob ang pagpangandam sa kapulisan sa Dakbayan sa Sugbo aron pag-angkon og malinawon nga eleksyon.
Si Police Colonel Enrico Figueroa ang hepe sa Cebu City Police Office (CCPO) nangunay sa pag-supervise sa gilusad nga National Simulation Exercise (SIMEX) nga gipasiugdahan sa PNP Command Center sa kampo Crame.
Gihimo ang National Simulation Exercise niadtong Mayo 2, 2025 sa gawas ug sulod sa Cebu City Hall, nga adto ipahigayon ang canvassing ug gi-monitor kini sa PNP National Headquarters pinaagi sa Zoom aron masukod unsa kaandam ang kapulisan sa tibuok nasod.
Ang estrikto nga simulation exercise nagtutok sa nagkalainlaing scenario sama sa hostage taking situations.
Ang maong pagbansay gitumong aron pagsusi kon unsa kaandam ug ang operational capabilities sa Police Regional Office 7 ilabi na ang kapulisan sa Dakbayan sa Sugbo.
Ang maong exercise dili lang ang pag-evaluate, apil na ang pagsukod sa katakus sa CCPO lakip na niini ang paghatag sa PNP Command Center ug feedback ug assessment kon unsay ilang angayan nga palambuon.
Gidayeg ni Figueroa ang paningkamot nga gihimo sa PNP ug paghatag og kasiguroan sa seguridad sa Siyudad sa Sugbo.
Kini nga tinguha nasubay sa flagship program nga gipatuman ni Police Brigadier General Redrico Maranan ang hepe sa Police Regional Office 7 nga nagsentro sa pakig-alayon sa komunidad sa ilang public safety strategies.
Pinaagi sa pagpalambo sa police visibility ug pagpalig-on sa patrol operations ang CCPO masaligon nga makab-ot ang gitinguha nga hapsay ug malinawon nga election. / AYB