Usa ka single mom ug laing tulo ka mga indibidwal ang nangasikop sa kapulisan sa Carbon Police Station atol sa gipahigayon nga buy-bust.
Nasikop pagbalik sa ikatulong higayon si alyas “Rose” 32-anyos,usa ka single mom ug kanhi commercial sex worker nga residente sa Dakbayan sa Toledo human nakuhaan og dili mominus 10 ka pakete sa gituohang shabu ingon man ang P200 nga buy-bust money kagabii, Hunyo 5,sa may Barangay Ermita, Dakbayan Sugbo.
Si “Rose” nagkanayon nga napugos nalang siya sa ilegal nga kalihukan sanglit siya nalang usa nagbuhi sa iyang tulo ka mga anak human sa panagbuwag sa iyang kaipon.
Sa susamang adlaw, mga alas 10:00 ang takna sa kagabhion nadakpan usab sa Sitio Bato, Barangay Ermita, ang manag-uyab nga sila si alyas Zoren 25, ug Janice 27, puros mga walay trabaho nga nagpuyo ra sa naasoyng lugar.
Ang manag-uyab napusasan sa kapulisan human nakuhaan og pipila ka pakete sa gituohang ilegal nga drugas nga dunay gibug-aton nga 5 gramos nga nagkantidad og P34,000.
Nadakpan sab mga ala 1:00 sa kaadlawn, Hunyo 6,2025, si alyas Berto 46-anyos,walay trabaho ug nagpuyo sa Barangay Ermita.
Si Berto nakuhaan og dili momenus sa napulo ka mga pakete sa gituohang shabu nga mokantidad og P6,800.
Ang upat ka mga suspek nasikop atol sa buy-bust nga gipahigayon sa mga sakop sa Stations Drug Enforcement Unit (SDEU) sa buhatan sa Carbon inabagan sa PDEA-7.
Ang mga nasakmit nga ebidensya gisumiter na sa PNP Cebu City Forensic Unit alang sa dugang examinasyon.
Sa pagkakaron, nagtingkagol na ang mga suspek sa Carbon Police Station ug mag-atubang og kasong nalambigit sa ilegal nga drugas. / JDG