Usa ka samad pinusilan sa ulo ang mitapos sa kinabuhi sa 29 anyos nga single mother nga gipatay sud sa internetan sa Sityo Paradise II, Barangay Kinasang-an, Dakbayan sa Sugbo sa alas 3:30 sa buntag, Miyerkules, Oktubre 30, 2024.
Ang biktima giila nga si Josery Tabilo Apostole, 29, nga residente ra usab sa maong lugar nga dunay duha ka mga anak nga nagpangedaron og 6 ug 3 anyos.
Matod sa tag-iya sa internetan (nagdumili sa pagpaila) nga didto siya sa luyo sa maong panghitabo ug usa ka buto ang iyang nadungog.
Sa iyang pagsusi iya nalang nakita ang biktima sa lingkuranan nga wala nay kinabuhi nga adunay samad sa ulo agi sa pinusilan.
Nakita CCTV sa maong internetan ang suspek nga nailhan nga si Wilfredo Pologon Nadera, 22, residente sa usab sa maong lugar ug giingong barkada ra sab sa biktima.
Sa inisyal nga imbestigasyon sa kapulisan nga nagduwa og scatter ang biktima.
Usa sa mga saksi nga nagduwa sa computer mitug-an nga sa wala pa pusila ang biktima kuyog niini si Nadera ug pipila ka oras ang milabay nagkalalis ang duha ug mibunot sa gidala nga armas dayon pusil ngadto ni Apostole ug dali nga misibat ang suspek.
Ang inahan sa biktima nga nahinabi sa sibyaanan DyHP nagkanayon nga wala siya masayod nga dunay hulga sa kinabuhi ang iyang anak.
Apan iyang gibutyag nga aduna kini ka live-in nga laing lalaki human nga nagbuwag sa amahan sa kamanghorang anak.
Sa pangutana kung nalambigit ba sa ilegal nga drugas ang iyang anak, matod sa inahan; “Wala gyud ko kabawo sir kung naapil na siya ana siya ra gyuy nakahibawo.”
Ang Inayawan Police Station milusad na sa manhunt batok sa suspek diin ilang gisubay ang mga dapit nga posibleng iyang gitaguan.
LAING GIPUSIL
Sa laing bahin, pagka alas 4:20 sa buntag sa susamang adlaw laing pagpamusil ang nahitabo sa T. Padilla street, Barangay Day-as, Siyudad sa Sugbo.
Ang biktima giila nga si Jerry Obien Ramos alyas Amang, 22, residente sa 253 T. Padilla street, Barangay Day-as.
Sa imbestigasyon sa Parian Police Station nasayran nga samtang naglingkod sa kilid sa karsada ang biktima kalit lang nga naabot ang suspetsado nga gihulagway sa mga saksi nga nagsul-ob og itom nga sinina ug puti nga karsones ug dayong duol sa biktima.
Pipila ka segundo, tulo ka buto sa armas ang ilang nadungog ug ang biktima nahagba na samtang ang suspetsado yano lang kini nga nilakaw palayo.
Dali nga gidala ang biktima sa Cebu City Medical Center sakay sa taxi ug giingong naa na sa luwas nga kahimtang tungod kay pulos ra tapsing ang naangkon niini nga samad pinusilan.
Ang mga imbestigador sa Parian Police Station nakakuha og tulo ka basiyo sa bala ug duha ka slug sa kalibre 45 nga pistola.
Giingong siaw sa ilang lugar ang biktima nga kusog mangomedya apan wala matod pa makauyon ang suspetsado. / AYB