Hingpit na nga gidili ang paggamit sa plastic nga kausa lang magamit kun single-use plastics (SUP) sa University of San Carlos (USC).
Niepekto kini nga lagda sa pagsugod ning tuig tigtungha 2023-2024 sa kinatibuk-ang unibersidad lakip sa mga administrador, magtutudlo, kawani, tinun-an, manindahay sa kantina, ug mga bisita nga mosulod sa Talamban ug downtown campus.
Uban niini nga kalamboan, giawhag sa unibersidad ang komunidad niini sa pagdala sa matag usa sa tubig imnanan nga mabitbit ra, mga sudlanan sa pagkaon, ug kaugalingong mga kubyertos.
Nipagawas sila si Atty. Joan S. Largo, JD, LLM, bag-ong luyoluyong pangulo alang sa administrasyon sa USC, ug Fr. Jesuraj Anthoniappen, SVD, Ph.D., ingon man sa akademikong tulumanon, og hiniusang pahibalo sa pagka Agusto 24 ning tuiga.
“Isip Katolikong Unibersidad, tumong sa USC ang matinud-anong pagtuman sa panawagan ni Pope Francis nga gipamahayag sa iyang 2015 Ecological Encyclical, ‘Laudato Si,” tipik sa maong pahibalo.
Nipatin-aw sila si Largo ug Anthoniappen nga kining kinatibuk-ang gibuhat sa unibersidad mao ang paagi niini sa “pagsulbad sa pagbayad sa krimen nga nahimo batok sa natural nga kalibutan.”
Gibuhat ni’ng lakang samtang nagtimaan ang USC sa ika-75 nga Charter Anniversary isip usa ka Unibersidad, ang kabahin niini sa “pag-atiman ug pagtunhay sa atong kumon nga panimalay, Inahang Kalibotan.”
Giisip ang mga SUP nga mga nagdahig sa planeta.
Nakita sa mga pagtuon nga ang usa ka botelya nga polyethylene terephthalate (PET) molungtad og 450 ka tuig, mga straw 200 ka tuig, plastik nga mga kobyertos kapin sa 100 ka tuig, plastik nga tasa sa kape 30 ka tuig, putos nga plastik 20 ka tuig, ug styrofoam, hangtod sa hangtod.
Subay sa pahibalo, ang mga produktong gigamita’g SUP dili na magamit ug dili matugotan nga makasulod sa Talamban ug downtown campus. Gimanduan ang mga security guard nga hingpit ipatuman ang bag-ong lagda.
Kini naglakip sa mga botelya sa tubig, mga takob sa botelya, mga plastic bag, putos sa pagkaon, kobyertos, mga plato, init nga ilimnon nga gisulod sa tasang styrofoam, ug uban pa.