Way kapilian. Sa ikaduhang higayon, ang Sinulog ritual showdown sa Enero 2024 ipahigayon sa ikaduhang higayon sa South Road Properties (SRP).
Dili gihapon kini mapahigayon sa Cebu City Sports Center (CCSC) tungod sa duha ka mga bug-at nga konsiderasyon.
Una, ang rehabilitasyon sa CCSC nagpadayon. Ikaduha, ang Cebu Bus Rapid Transit (CBRT) project sa Osmeña Blvd. nga dili paborable sa street dancing ug bul-og sa mga tawo.
Si Elmer “Jojo” Labella, executive director sa Sinulog Foundation Inc., nibutyag niini atol sa press conference sa Martes, Nobiyembre 14, 2023.
Matod ni Labella, nagplano na sila karon sa pagpalambo sa pagpahigayon sa SRP human sa unang kasinatian sama sa pagbutang og igong bleachers, kapasilungan ug uban pa.
Sa Sinulog sa SRP sayo ning tuiga, nakita nga maayo tungod sa kalapad sa dapit apan niani kini og daghang negatibo’ng reaksyon.
Hawan ug walay kahoy. Init kaayo. Way igong kapasilungan, labina kon mag-uwan. Kuwang usab ang bleachers.
Ang nanan-aw nga namayad og entrance para sa bleachers nagyawyaw human masudlan lang ni bisan kinsa, way koral.
Ang contingents nakakomentaryo usab nga way maayong koordinasyon sa marshal hinungdan sa taas nga paghunong ug lak-ang sa carousel
Usa sa gitumbok nga hinungdan ning tanan tungod sa way klarong plano. Pagdali-dali og hukom ni Mayor Michael Rama sa pagbalhin niini sa SRP.
Kaadlawon na sa adlaw sa Sinulog, nagsige pa og trabaho busa way igong rehearsal sa mga contingent labi na sa entablado.
Nalantawan na kadto ni Gob. Gwendolyn Garcia busa wa moapil sa unang Sinulog sa SRP. Hinuon, matod ni Labella, ang gobernador nipadayag og interes sa pag-apil og balik sa Sinulog.
Makorehian kaha ang kasaypanan? Peligro, atol sa presscon, si Labella wa makatubag bahin sa gikinahanglang budget alang sa Sinulog 2024. Ning panahon, dili na unta kwestiyon ang budget. Nagsugod na ang trabaho sa pag-andam sa dapit.
Hinaut nga masugdan na ang trabaho aron wala nay bulilyaso sa Sinulog sa SRP.