Agi'g pagpangandam sa umaabot Kalagkalag sunod semana, gipahibalo sa kagamhanan sa dakbayan sa Lapu-Lapu nga anaa sila'y sirhan nga dalan ingon man gitakda nga parking locations karong Nobiyembre 1 ug 2.
Sa pakighinabi sa SunStar Cebu niadtong Oktubre 22, si Mario Napule, pangulo sa City Traffic Management System (CTMS) office, mitino sa pampubliko ug pribado nga mga sam-ang sa Lapu-Lapu nga gilauman nga dagsaon sa mga tawo nga mobisita sa ilang mitaliwan na nga mga minahal sa kinabuhi.
“Mao ni atong gipreprahan, pinakasamok na medyo baga og tao na sam-ang kining Humay-Humay ug Barangay Marigondon,” matod ni Napule.
Temporaryo nga sirhan ang dalan paingon sa Humay-Humay Cemetery gikan sa alas 4 sa kadlawon hangtod sa alas 12 sa tungang gabii sa tanang motorista ug sakyanan gikan sa Nobiyembre 1 ug 2, matod sa pangulo sa CTMS.
Dugang ni Napule nga gitagana isip one-side parking sa maong sam-ang ang mga dalan sa Hoops Dome ug Maximo V. Patalinghug Avenue.
Samtang ang ubang mga dapit sa dan Humay-Humay ug dan S. Osmeña dili masudlan og mga sakyanan.
Dili sab maagian ang mga dalan sa Bukana, Ceres, ug Sangi.
Apan matod ni Napule nga mamahimo rang makasulod kadtong mabdos, mga indibidwal nga adunay mga kapansanan, ug mga senior citizen aron pag-drop off.
Dugang niini nga 20 ngadto sa 30 ka CTMS personnel ang ipakatap sa lugar aron masiguro ang pagdumala sa dagan sa trapiko ug pag-monitor sa mga motorista.
Samtang gilauman usab ang kasarangan nga dagan sa trapiko sa duha ka pribadong mga sam-ang sa Lapu-Lapu, partikular sa Mactan Island Memorial Garden (MIMG) ug Haven of Peace Memorial Garden.
Matod ni Napule nga ang outer lane sa Barangay Basak-Marigondon Road gamiton sa mga motorista nga mopaingon sa Marigondon ug sa kasikbit nga lungsod sa Cordova, samtang ang inner lane gamiton sa mga motorista nga mopaingon sa menteryo.
Sa laing bahin, ang Haven of Peace Memorial Garden sa Barangay Mactan wala'y mga karsada nga sirad-an apan gipaabot usab nga modagsa ang mga bisita.
Matod ni Napule nga 15 ka traffic personnel ang ipakatap sa Barangay Marigondon ug laing upat usab sa Mactan.
Ang tanang traffic guidelines ug road closures ilibkas ngadto na sa Sabado, Nobiyembre 2, matod ni Napule.
Human sa malinawon nga paghandom sa miaging tuig, ang tigpamaba sa Lapu-Lapu City Police Office (LCPO) nga si Christian Torres sa buwag nga pakighinabi nagpaabot sa pagdagsa sa mga bisita sa holiday nga mahulog sa weekend.
Ang tigpamaba sa LCPO nipahinumdom sa mga bisita nga gidili ang pagdala og bisan unsang armas, ilimnong makahubog, ug butang nga pangsugal bisan baraha sulod sa mga sam-ang.
Silot sama sa ilegal nga paghupot sa makamatay nga mga hinagiban, ilegal nga sugal, ug kasong alarm and scandal ang mahimong ipasaka batok sa mga indibidwal nga mosuway paglapas sa mga lagda.
Ang Nobiyembre 1 ug 2 gideklarar na nga usa ka special non-working holiday ug tradisyon sa Katoliko sa pag-obserbar sa tanang nga nitaliwan ug pagbisita sa mga sam-ang. / DPC