Gikatakdang mopalit ang kagamhanan sa Siyudad sa Sugbo og laing lima ka parsela sa yuta nga mokabat sa 3,763 square meters (sqm) sa Barangay Mambaling aron mahatagan og dalan ang Package 2 sa Cebu Bus Rapid Transit (CBRT).
Ang mga lote gipanag-iya sa Cruisers Property Management Corp. (3,539 sqm), 128 sqm ug 38 sqm sa magtiayong Zosima Bequilla ug Jimmy Bequilla ug 30 sqm ug 28 sqm sa magtiayong Steve Sia ug Jocelyn Sia.
Gihatagan na sa konseho pinaagi sa resolusyon nga gipangamahan ni Konsehal Rey Gealon atol sa regular session niadtong Miyerkules, Marso 26, 2025, si Mayor Raymond Alvin Garcia og katungod nga mopirma sa deeds of absolute sale ug memorandum of agreement tali sa mga tag-iya sa lote.
Apan atol sa session, gihangyo ni Konsehal Nestor Archival ang Secretariat sa konseho nga i-review ang records sanglit ni-sponsor man siya og mga resolusyon niadtong Pebrero nga naghatag og pagtugot sa mayor nga makapalit og mga lote sa Mambaling.
Matod niya, sa iyang nahinumdoman, ang tag-iya sa mga lote nga nahisgutan sa resolution ni Gealon susama ra sa iyang mga resolusyon.
Bisan og nihisgot si Archival nga ang iyang kanhing resolusyon mao ang pagpalit og mga lote aron mahatagan og dalan ang housing program sa kagamhanan sa dakbayan, apan matod niya, dili angayan ang pagpalit og duha ka lote sa samang tag-iya.
Sa pagrepaso, giklaro sa Secretariat sa konseho nga managlahi ang lote ug numero sa titulo sa mga resolusyon ni Archival ug Gealon.
"Parehas nga partido sa mga namaligya sa mga kabtangan, apan lahi nga numero sa lote," ingon sa Secretariat.
Dugang sa katin-awan, si Gealon niingon nga ang mga lote nga gitakdang paliton kabahin sa CBRT project.
Sa dihang naaprobahan ang mga resolusyon, si Konsehal Jocelyn Pesquera ni-abstain sa pagbotar aron aprobahan ang mga resolusyon.
Ang City Government maoy gitahasan sa pagbalhin sa titulo sa mga luna nga nakuha sa ngalan sa Republika sa Pilipinas pinaagi sa Department of Transportation.
Ang Package 2 sa CBRT gikan South Road Properties paingon sa Mambaling agi sa N. Bacalso Ave. modugtong sa Package 1 -- gikan sa Cebu South Bus Terminal ngadto sa Capitol. / JPS