Gikondenar sa magbabalaod sa Dakbayan sa Lapu-Lapu ang pag-atake sa Filipino community nga nisalmot sa Lapu-Lapu Day Festival niadtong Dominggo, Abril 27, 2025, sa Vancouver, Canada, diin 11 ka tawo ang nakalas ug ubay-ubay ang naangol.
Si Konsehal Efren Herrera, chairman sa Committee on Foreign Relations, nisugyot og resolusyon nga giulohan og “A Resolution Condemning in the Highest Possible Terms the Terrible Attack on the Filipino Community in Vancouver, Canada During the Celebration of Lapulapu Day on April 27, 2025,” nga hiniusang gipasiugdahan ni Konsehal Joseph Pangatungan, chairman sa Committee on Tourism.
“The City of Lapu-lapu strongly condemns this gruesome attack and [calls] on the Canadian Authorities to thoroughly investigate the incident and bring the perpetrators to justice and come up measures to prevent and ensure the safety and protection of the Filipinos and other immigrants living in Canada,” tipik sa nalatid sa maong resolusyon.
Ang kalihukan nga nagtimaan sa ika-504 nga anibersaryo sa Battle of Mactan, nahimong trahedya sa dihang ang sakyanan nga gimaneho sa 30 anyos nga Kai-Ji Adam Lo gikan sa
-Vancouver, nibangga sa panon sa mga partisipante sa East 43rd Avenue ug Fraser Street sa south Vancouver nga niresulta sa pagkamatay sa 11 ka tawo ug pagkaangol sa pipila ka mga indibiduwal.
Ang mga namatay nagpangedaron sa singko hangtod 60 anyos.
Ang driver nga si Lo nga unang nadakpan sa mga estambay sa wala pa masikop sa kapulisan, gipasakaan na og walo ka ihap sa kaso’ng second-degree murder. / DPC