Napriso sa City of Naga Police Station ang usa ka amahan nga kanhi barangay konsehal tungod sa giingong pagkulata sa iyang anak nga Sangguniang Kabataan (SK) chairman alas 6:30 sa gabii sa Dominggo, Hulyo 14, 2024 sa Purok Centro 2, Brgy. Tagjaguimit, Dakbayan sa Naga, habagatang Sugbo.
Nahitabo ang pagpangulata atol sa lega sa basketball.
Ang biktima nga si alyas Redgie, 22, ulitawo, taga Purok Centro 2 samtang ang suspek nga amahan mao si alyas Carmilo, 44.
Matod sa kapulisan, i Redgie mao ang nanawag og police assistance sa City of Naga Police Station kay gikulata siya sa iyang amahan ug nagubot ang SK Summer League nga iyang gipangulohan.
Nahunong ang duwa tungod sa gibuhat sa suspek. Gidakop gilayon sa kapulisan ang suspek ug gibalhug sa holding cell sa police station.
Desidido ang biktima nga mokiha sa iyang amahan kay giingon nga ikaduha na kini nga gibuhat sa suspek kaniya, ang una iyang gipasaylo.
Mga kasong alarm and scandal ug slight physical injury ang ipasaka sa kapulisan batok sa suspek. / DVG