Konsehal sa Sangguning Kabataan (SK) sa usa ka barangay sa lungsod sa Tabogon, amihanan sa lalawigan sa Sugbo, nasikop sa buy-bust sa Brgy. Canao-canao alas 12 sa tungang gabii sa Miyerkules, Disyembre 13, 2023.
Ang suspek giila nga si Cristian Jay Pelayo Linabog, alyas Loklok, 21, SK councilor sa Canao-canao, kinsa giila sa kapulisan nga high value individual (HVI).
Sa dugang pakisayod gikan sa Municipal Drugs Enforcement Unit intelligence Police sa Tabogon, nasayran nga nakadawat sila og taho bahin sa kalihukan sa suspek ug ilang gi-validate.
Sulod sa pipila ka semana nga validation, nasuta nga positibo ang kasayuran nga namaligya og shabu ang SK councilor.
Gilusad dayon sa kapulisan ang buy-bust nga gipangulohan sa ilang hepe nga si Police Capt. Florencio Cabanlit Jr. ubos sa koordinasyon sa Philippine Drug Enforcement Agency (PDEA 7).
Ang poseur buyer sa kapulisan nigamit og P500 marked money bugti sa gamay nga pakite sa shabu gikan sa suspek.
Sa dihang gidakop ang suspek, nakuhaan pa kini og dugang tulo ka gagmay nga pakete sa gituohang shabu.
Ang suspek gitanggong sa kapulisan ug gikatakda nga pasakaan og tukmang kaso bahin sa pagnegosyo sa gidiling drugas.