Patay na nga nadangat sa tambalanan ang 23-anyos nga lalaki human kini gipusil sa SK Federation President sa Argao sa makadaghang higayon mga alas 11:16 sa kagabhion, Hulyo 11 sa usa ka restobar nga nahimutang sa Barangay Poblacion, sa maong lungsod.
Nailhan ang biktima nga si Elmer Angelo Amarillo, usa ka college student ug nagpuyo ra sa nahisgutang barangay.
Samtang ang namusil mao si Mark Alphonus Villamora, 21 anyos ug residente sa Barangay Lamacan sa susamang lungsod.
Matod ni Police Captain Carlos Narca, deputy chief sa Argao Police Station, sa niaging tuig pa ang panagbingkil tungod sa selos ug love triangle ug dunay pagpamahad.
Dihang nag-abot na ang duha sa naasoyng imnanan, wa na kapugong ang suspek sa iyang kaugalingon ug hubog niadtong higayona ug gipusil sa makadaghang higayon ang biktima nga maoy hinungdan sa iyang kamatayon.
Girespondihan sa kapulisan ang alarma ug nasikop ra ang maong suspek.
Nakaangkon og mga samad pinusilan ang biktima sa iyahang ulo ug nagkalainlaing parte sa lawas.
Gisuwayan pa pagdala ang biktima sa Isidro C Kintanar Memorial Hospital apan gideklarar kining dead on arrival mga alas 2:30 sa kaadlawn, Hulyo 12.
Nasakmit sa kapulisan ang 9mm nga pistola nga gigamit pagpatay sa suspek ngadto sa biktima.
Samtang ang mga sakop sa SOCO team nakarekober og siyam ka mga fired cartridge cases, duha ka fired bullet, usa ka deformed slug,ug usa ka fragment.
Gibalhug na sa Argao Police Station ang suspek ug mag-atubang kinig kasong murder.