Dili na kinahanglan nga magparehistro pa og balik ang mga botante sa Sangguniang Kabataan nga miedad na og 18 anyos kay automatic kini nga gikarga isip regular nga botante.
Mao kini ang gipahibalo sa Commission on Elections (Comelec) niadtong Sabado, Agusto 2, 2025.
Sa online interview, si Comelec Chairman George Garcia nagkanayon nga ang mga batan-on nga botante nga pwede na nga makabotar sa barangay elections dili na kinahanglang magparehistro pag-usab.
“Those who have turned 18 years old will be automatically transferred. We will just import the registration (records) from SK to regular voters,” matod ni Garcia. “We will automatically import them. We will just extract their records from SK to regular voters,” dugang niini.
Ang mga botante sa SK nagpangedaron og 15 ngadto sa 30 anyos atol o bag-o ang Disyembre 1 nga Barangay and Sangguniang Kabataan Elections (BSKE).
Sa laing bahin, ang mga regular nga botante nga angayan nga mobotar sa mga opisyal sa barangay mao ang mga nag-edad og labing menos 18 anyos.
Agusto 1 dihang gibuksan pagbalik sa Comelec ang ilang mga kalihokan sa pagparehistro sa mga botante sa tibuok nasod, nga molungtad hangtod Agusto 10.
Sa unang adlaw, nagpunsisok ang mga aplikante sa Offices of the Election Officer, satellite registration sites sa tibuok nasod, ug sa Special Register Anywhere/Anytime Program (SRAP) sites. / Anton Banal
