Taliwala sa panawagan sa Cebuano basketball fans nga moduwa siya sa iyang hometown team, nipirma ang 7-footer nga si Greg Slaughter sa Basilan Red Dynasty, nga nagpalig-on sa ilang puwersa alang sa ilang kampanya sa Maharlika Pilipinas Basketball League (MPBL).
Sa sayo pa, si Slaughter gisuwayan unta pagkuha sa Cebu Classic apan wala na-finalize ang negusasyon.
Dihang bag-o na ang management sa Cebu team, nga gitawag na karon og Cebu Greats, nagkuha kini og mga magduduwa nga makapalig-on sa ilang puwersa apan wala naapil si Slaughter, kinsa produkto sa University of the Visayas (UV) Green Lancers.
Naghandom ang Greats nga sa ugma damlag, mabalhin sa ilang puwersa si Slaughter.
Ubos sa Red Dynasty, ikauban ni Slaughter ang laing produkto sa Green Lancers nga si Eman Calo lakip na ang kanhi mga magduduwa sa Philippine Basketball Association (PBA) nga sila si Arwind Santos, Jervy Cruz, ug Alex Cabagnot.
Masubhan si Slaughter isip sakop sa Red Dynasty karong Hulyo 14 batok sa Manila Batang Quiapo. / JBM