SA pagpangulo nila ni Jericho Cruz ug CJ Perez, nakabulhot ang opensa sa San Miguel Beermen sa 4th quarter nga naghubog sa TNT Tropang 5G, 105-91, niadtong Dominggo sa gabii, Hulyo 20, 2025, sa Game 4 sa Philippine Basketball Association (PBA) Season 49 Philippine Cup finals series sa Mall of Asia Arena sa Pasay City.
Ning kadaugan, ang Beermen nakaposte na og dominanteng 3-1 nga labaw sa best-of-seven series ug usa na lang ka daog, hingpit na nilang mapakyas ang Tropang 5G sa tinguha niining Grandslam title.
Si Cruz nakamugna og tulo ka three-pointers sa 4th quarter unya gisuportahan siya ni Perez sa matag unya hangtod na sa pagkapupos sa oras.
Kini maoy ikatulong sunodsunod nga kadaugan sa Beermen sa series human sa ilang kontrobersyal nga pagkapilde sa Game 1 diin gikuhaan sila og duha ka puntos sa krusyal nga bahin tungod sa offensive basketball interference nga isyu.
Nagkinahanglan na lang og usa ka daog ang Beermen aron maangkon ang ika-10 nilang All-Filipino title ug ika-30 sa kinatibuk-an.
Sa wala pa nagsugod ang duwa, gipasidunggan si Beermen giant June Mar Fajardo sa iyang ika-12 nga Best Player of the Conference award.
Puntos matag usa:
San Miguel (105) – Cruz 23, Perez 16, Fajardo 15, Trollano 11, Lassiter 10, Tiongson 8, Ross 7, Teng 6, Tautuaa 4, Calma 3, Brondial 2.
TNT (91) – Heading 23, Williams 14, Ganuelas-Rosser 14, Oftana 11, Pogoy 11, Khobuntin 7, Erram 6, Vosotros 3. Quarters: 21-23, 45-37, 64-67, 105-91. / ESL