Mga duwa karon:
5:00 pm- Terrafirma batok Converge 7:30 pm- San Miguel batok Phoenix
Sugdan sa powerhouse San Miguel Beermen ang ilang kampanya sa Philippine Basketball Association (PBA) Season 49 Governors’ Cup pinaagi sa pagpakigbatok sa Phoenix Super LPG Fuel Masters sa main game karong gabii, Miyerkules, Agusto 21, 2024, sa Smart Araneta Coliseum.
Ang Sugboanong higante nga si June Mar Fajardo, kinsa bag-uhay lang nidawat sa iyang rekord nga ikawalong MVP award, maoy mangulo sa Beermen ug ning higayuna, kaabag niya si import Jordan Adams.
Gikan sa paghiabot ni Fajardo sa PBA niadtong 2012, ang Beermen ningdominar sa Philippine Cup o All-Filipino Conference diin nakalabni sila og pito ka mga titulo sa katapusang siyam ka mga edisyon.
Nakalabni sab ang Beermen og tulo ka mga titulo sa Commissioner’s Cup apan nagkagidlay sila sa Governor’s Cup nga katapusan nilang gipatigbabawan niadto pang 2015.
Usa kini ka dakong hagit alang ni Fajardo ug sa kinatibuk-ang puwersa sa Beermen.
Sa ilang bahin, ang Fuel Masters mosalig og maayo sa ilang import nga si Jayveous McKinnis.
Sa premirong duwa, magsangka ang Terrafirma Dyip ug Converge FiberXers sugod sa alas 5:00 sa hapon. / ESL