Mga duwa karon:
5:15 pm- Titan Ultra batok TNT
7:30 pm- San Miguel batok Macau
Parehong makigkontra ang San Miguel Beermen ug TNT Tropang 5G og “higanteng” mga puwersa sa pagbalik sa aksiyon sa Philippine Basketball Association (PBA) Season 50 Governors’ Cup sa Ynares Center Montalban karong Sabado, Agusto 8, 2026.
Ang Beermen makigsangka og balik sa guest team Macau Giant Pandas sa main game samtang ang Tropang 5G nga mao ang defending champion, makigsangka sa Titan Ultra Giant Risers sa premirong duwa.
Ang Beermen nagtinguha nga mausban nila paghubog ang Giant Pandas aron mas mapahugtan nila ang ilang paggunit sa ikaduhang luna sa Group A.
Kasamtangang naggunit ang Beermen og 5-2 nga rekord samtang ang Giant Pandas nagbitay sa ilawom nga bahin bitbit ang 2-5 nga rekord.
Sa premirong panagsangka sa duha ka mga kampo niadtong Hulyo 14, gipanglampornas sa Beermen ang Giant Pandas, 123-109.
Sa laing sangka, ang Tropang 5G mosuway pagbawos sa Giant Risers nga ningmakmak kanila sa premiro nilang engkuwentro, 103-87, sa premiro nilang sangka niadtong Hulyo 22.
Lisod kini nga tahas alang sa Tropang 5G hilabi na kay padayon silang mokombati nga wala ang ilang mga pambatong sila si Calvin Oftana, Roger Pogoy, Jordan Heading, ug Jayson Castro (pulos adunay angol).
Hinuon, taliwala sa ilang sitwasyon, ang Tropang 5G nakamaneho gihapon sa pagposte og 3-3 nga rekord, ikatulo sa Group A, samtang ang Giant Risers nagbitay sa ilawom nga dapit dala ang 2-5 nga rekord. / ESL