Magpinakasitay og balik ang TNT Tropang 5G ug San Miguel Beermen karong Miyerkules sa gabii, Hulyo 16, 2025, alang sa Game 2 sa Philippine Basketball Association (PBA) Season 49 Philippine Cup finals series sa Smart Araneta Coliseum.
Ning sangkaa, pareha ang mentalidad sa duha ka mga kampo hilabi na ang Beermen – ilubong sa kalimot ang nahitabong kontrobresya sa Game 1.
Dili ikalimod nga lisod kalimtan dayon sa Beermen ang gibati nilang sakit human sa ilang kapildihan sa Game 1, 96-99, nga nahimong posible tungod sa kontrobersyal nga offensive basketball interference nga desisyon sa mga opisyal, nga nagkaltas kanila og duha ka mahinungdanong mga puntos sa himatyong mga segundos.
Apan kinahanglang kalimtan sa Beermen kini hitaboa aron makatutok sila sa Game 2 ug dili maapektuhan ang ilang duwa sa pagsuway nila’g tabla sa best-of-seven series.
“I told the team it’s beyond our control (now) so let’s focus and let’s move forward. Let’s be motivated by the incident,” matod ni San Miguel coach Leo Austria nga napatik sa www.pba.ph.
Sa Game 1, ang Beermen ningbangon gikan sa 24 puntos nga pagkalubong sa 3rd quarter ug diriyot pa nila nakuha ang kadaugan kon wala pa nahitabo ang kontrobersya kabahin sa hansak ni SMB big man Mo Tautuaa sa nahabiling 56 ka mga segundos nga naghatag sa Beermen og 98-97 nga labaw.
Atol sa usa ka jumpball sa nahabiling unom ka mga segundos, temporaryong gihunong ang kombati gumikan kay gisusi pagbalik ang hansak ni Tautuaa ug nadesisyunan kini nga not counted tungod sa offensive basketball interference nga lagda.
Niini, gikuhaan og duha ka mga puntos ang Beermen ug sila na ang naggukod, 96-97, niadtong gutloa.
Sa habig sa Tropa, nga nagtinguha sa talagsaong Grandslam title ning komperensiyaha, dili sab nila bastabasta malimtan kon nganong kalit nga napapas ang ilang 24 puntos nga labaw sa Game 1, nga nahimong posible tungod sa makahubog nga 19-0 nga rally sa Beermen.
“We missed a couple of layups and that’s what happens against a team like San Miguel. When you give them an inch of opportunity, they’re going to pounce on it. But good enough, we kept our composure in the end,” matod ni TNT coach Chot Reyes.
Nasayod si Reyes nga mamungot ang Beermen ning higayuna tungod sa nahitabo sa Game 1 ug mao kini ang ilang gipangandaman og maayo sa Tropa. / ESL