Nagtingkagol sa bilanggoan sa Mambaling Police Station sa Cebu City Police Office (CCPO) ang usa ka suspetsadong snatcher human masikop sa usa ka polis ug mga barangay tanod human nanglabni og mahalong cell phone gikan sa usa ka kolehiyala alas 6 sa Huwebes sa gabii, Pebrero 29, 2024, sa 4th Street, Duljo Fatima, Siyudad sa Sugbo.
Ang suspek giila nga si Raymond Gimogala, 25 , ulitawo, taga Blackcats, Duljo Fatima.
Ang biktima mao si Anejoy Bello, 19, dalaga, tinun-an sa first year college, kasamtangang nagpuyo sa usa ka boarding house sa barangay.
Sa imbestigasyon sa kapulisan sa Mambaling Police Station, ubos sa kamanduan sa ilang hepe nga si Police Major Jonathan Bethooven Taneo, nasayran nga ang biktima naglakaw sa maong dapit gikan sa iyang eskwelahan padulong mopauli.
Nagbitbit siya sa iyang Samsung A31 nga cell phone dihang gikalitan og labni ni Gimogala.
Apan nakasinggit siya og tabang ug tayming nga diha si Patrolman Raymark Cawaling ug mga tanod sa Duljo Fatima hinungdan nga gigukod ang suspek ug nadakpan, na-recover ang cellphone sa biktima. Ang suspek gi-turnover ngadto sa Mambaling Police Station. / DVG