Gitapos kagahapong adlawa, Disyembre 15, 2023, ang unom ka buwan nga Explosive Ordnance Disposal/K9 Handlers course sa Philippine National Police (PNP) nga gipahigayon dinhi sa Sugbo.
Gihimo ang graduation sa Hinirang Hall sa PC Hills sa Barangay Lahug, dakbayan sa Sugbo diin si Police Brigadier General Albert Magno, director sa EOD/K9 Group sa Camp Crame, gipresentahan sa iyang deputy director for operations nga si Police Colonel Jonathan Abella.
Matod ni Abella nga moabot sa 39 ka mga polis ang malampuson nga ningtapos sa maong kurso gikan sa tulo ka rehiyon sa Visayas, lima sa Region 6, lima Region 8 samtang sa Central Visayas moabot og 15 ka police personnel.
Sulod sa unom ka buwan gitudloan ang mga polis unsaon pag-detect sa bomba ug unsaon pagbansay ang mga iro sa pagsimhot sa bomba.
Mahinungdanon kini nga kurso human sa mga insidente sa pagpamomba sa Mindanao diin ang labing uwahi mao ang bombing sa sulod sa Mindanao State University sa dakbayan sa Marawi.
Kon dunay madawat nga hulga sa bomba sa usa ka edepisyo o kadudahan nga bagahe, sila nga napaubos sa training sa EOD/K9 Handling maoy motubag ug mosulbad niini sanglit gitudloan sila unsaon pag defused sa bomba.
“Kini siya importante ni siya sa atoa karon kay ang trending nato karon ang pag-maintain sa peace and order regarding sa suspicious baggages..” matod ni Abella.
Tudloan usab sila unsaon sa pag train sa mga iro sa pag-ila sa bomba nga usa sa labing lisod nga tahas kanila.
Dugang ni Abella, ang PNP nanginahanglan og daghang personnel nga well-trained sa bomba ug pag detect niini sanglit pipila lang ang ningkuha sa maong kurso.
Matod ni Police Major Lenard Carandang, kanhi assistant chief sa Regional Explosives and Ordnance Disposal Canine Unit 7 nga ang usa ka polis kinahanglan dunay usa ka iro nga iyang bansayon.
Sulod sa pila ka semana makig bonding ang maong polis sa iyang iro hangtod nga iya nang masinati ilabi na sa batasan aron nga magkasinabot sila kon unsa man ang ilang ipabuhat sa matag usa.
Ang EOD/K9 Unit 7 duna lamay upat ka sniffing dogs nga maoy gamiton kon dunay dagkong mga kalihukan ang Central Visayas sama sa Sinulog.
Abli sila kon dunay mo donate og iro sama sa Belgian Malinois ug laing matang sa purebred nga iro.