Kapin sa 115,000 ka mga panimalay nga benepisyaryo sa Pantawid Pamilyang Pilipino Program (4Ps) sa Central Visayas ang nigraduwar sa self-sufficiency program sa Department of Social Welfare and Development (DSWD).
Sa labing uwahing report sa DSWD, 79,205 ka mga panimalay nga gikan sa lalawigan sa Sugbo, lakip ang Cebu City, Lapu-Lapu City, ug Mandaue City, samtang 36,524 nga gikan sa Bohol, ang nasuta nga self-sustaining na base sa Social Welfare Development Indicator (SWDI).
Maisip nga self-sufficient ang usa ka panimalay kinahanglang mouswag pinaagi sa survival (Level 1) ug subsistence (Level 2) nga mga yugto sa dili pa makaabot sa katapusang yugto, diin sila mahimong independente nga makasuporta sa ilang kaugalingon nga walay tabang gikan sa gobyerno.
Aron pag-ila sa ilang mga kalampusan, gisugdan na sa DSWD 7, ang pag-host sa Saulog 4Ps ceremonial graduation, sa pakigtambayayong sa mga lokal nga kagamhanan.
Usa ka seremonyas ang gipahigayon sa Dakbayan sa Lapu-Lapu sa Marso 17, diin si DSWD 7 Regional Director Shalaine Marie Lucero nipahalipay sa mga benepisyaryo.
Ang mga gradwado sa maong programa, sumala sa DSWD 7, magpadayon aron makakuha og trabaho sa publiko ug pribadong sektor. Uban nanimpalad sa gagmay nga negosyo ug panginabuhian sama sa pag-uma, pangisda, pamaligya'g pagkaon ug personal care services.
Kini nga mga trabaho naglakip sa mga magtutudlo, pulis, overseas Filipino workers, seafarers, ug business process outsourcing (BPO) nga mga empleyado. / EHP