Kapin sa P1 milyon nga balor sa ilegal nga drugas ang nasakmit sa managlahi nga anti-illegal drug operation niadtong Sabado ug Dominggo nga niresulta sa pagkasikop sa unom ka mga tawo.
Unang nasikop ang duha ka lineman sa usa ka telephone company atol sa gilusad nga buy-bust sa mga sakop sa Drug Enforcement Unit sa Talisay City Police Station alas 10:56 sa gabii sa Sabado, Enero 25, 2025, sa Sitio Kawayan, Brgy. San Roque, Talisay City.
Ang mga nasikop nga magsuon giila nga silang Jupher Soncados Cartagena, 38, ug ang maguwang niini nga si Junril, 40, pulos taga Sitio Sawsawan, Barangay San Roque.
Nakuha gikan kanila ang napulo ka putos sa gituohang shabu nga motimbang sa 100 gramos nga dunay standard drug price nga P680,000.
Duha ka semana nga gipaubos sa monitoring sa Talisay City Police Station ang duha ka magsuon nga nagtrabaho isip lineman sa usa ka telephone company.
Makabaligya sila og 100 gramos sa gituohang shabu matag semana gikan sa ilang supplier.
Sa Dakbayan sa Sugbo, nakasikop usab ang Parian Police Station og laing drug personality sa gihimong buy-bust, alas 7:50 sa gabii, Sabado, Enero 25, 2025, sa Sitio Lower Lumar, Brgy. T. Padilla.
Ang nasikop giila nga si Jomar TaƱajura Arcipe, 31, taga Sitio Laray, Barangay Carreta, Dakbayan sa Sugbo.
Nakuha gikan sa suspek ang napulo ka pakete sa gituohang shabu nga motimbang sa lima ka gramos nga dunay balor nga P34,000 ug mga drug paraphernalia.
Pagka alas 8:30 sa gabii sa Dominggo, Enero 26, 2025, nasikop usab sa Waterfront Police Station 3 ang usa ka high value individual sa Sitio Silangan 2, Barangay Tejero nga giila nga si Daniel Zabala Laurenciano alyas Dan, 33, taga Sitio Especapa, Barangay Tisa, Dakbayan sa Sugbo.
Nasakmitan si Dan og 11 ka gagmay nga putos ug usa ka dakong pakete sa gituohang shabu nga motimbang sa 37 gramos nga dunay standard drug price nga P251,600.
Lakip sa ilang nadakpan ang usa ka 40 anyos nga lalaki didto sa Sitio Looban, Barangay Tejero nga giila nga si Efren Sangon Reynes, taga Sitio Sambag sa maong barangay.
Nakuha gikan kang Efren ang ilegal nga drugas nga mobalor sa P34,000 nga balor ug mga gamit sa pagsuyop niini.
Pagka alas 8 sa gabii, ang Abellana Police Station 2 malampuson nga nakasikop sa laing drug personality sa Sitio Lower Kawayan, Brgy. Sambag 2.
Ang suspek giila nga si John Naz Rodriguez alyas Pare, 49, taga Filter Site, Barangay Tisa.
Nakuha sa mga operatiba ang duha ka putos sa gituohang shabu nga motimbang sa upat ka gramos nga dunay standard drug price nga P27,200.
Ang tanang nakuha nga ebidensya gi-turnover sa PNP Regional Forensic Unit alang sa Chemical analysis.
Kalapasan sa Section 5 ug 11, Article II, Republic Act 9165 ang atubangon nga kaso sa mga dinakpan. / AYB