Gitumbok ang social media nga dakog impluwensya sa mga batan-on sa ilang pag-apil sa May 2025 elections.
Ang mga batan-on maoy pinakadaghan o voting population.
Kini suma sa Political Science Professor gikan sa University of San Carlos, Niño Olayvar nga nakakita sa social media nga dunay dakong papel sa pag-umol sa voting behavior sa publiko.
Ang mga Gen Z ug millennials, mga nagpanuigon og 18 anyos ngadto sa 35 naglangkob sa 63 percent sa total voting population sa May 12, 2025 elections.
“A large component of their behavior stems from their unique generational experiences, which include the prevalence of new technology, social media for example,” matod ni Olayvar sa interview sa SunStar Cebu Lunes, May 12, 2025.
Matod ni Olayvar nga kining mga pangidarona dunay daghang access sa information hinungdan nga mas dali silang nakaila sa mga kandidato.
Matod ni Olayvar nga usa sa basihan mao ang pagtanditandi og listahan sa mga kandidato sa mga estudyante diha sa social media.
“We can see their preferred candidates, they also provide the reason why they’re voting for them, they explain. It allows discourse,” matod ni Olayvar.
Tungod kay mas sayon man sa mga estudyante ang pag- access sa social media, ang mga politiko ni-focus usab sa ilang kampanya dinhi.
Nidugang si Olayvar nga ang kinatibuk-ang mga botante kamao mosubay sa mga saad sa mga kandidato ug mohashas sa mga plataporma.
“Most of the candidates have generic statements, but the question is how would they do that? That’s where platforms come in… For example, candidates would promise to provide jobs. The question should be ‘how,” matod ni Olayvar.
“We have not reached that level of understanding (the platforms). Our electorate haven’t reached that level of capacity yet,” dugang niya./ JJL