Gidepensahan ni Cebu Province Vice Governor Glenn Soco ang pundo sa probinsiya nga P25 bilyon alang sa tuig 2025 kinsa miingon nga ang maong pundo projection ra kini sa administrasyon kon unsa ang mahimo nila nga mapalambo ug motakdo sa mga plano ug mga programa niini.
Ang pamahayag sa bise gobernador subay kini sa pagbutyag ni Provincial Administrator Joseph “Ace” Durano sa gipaabot nga kolektahon sa Kapitolyo nga anaa nalang sa P9 bilyunes karong tuiga ug P4 bilyunes nalang ang nahabilin nga kolektahunon sa buwan sa Hulyo hangtod Disyembre.
“Budgets are assumptions. You cannot determine the actual outcome until you’ve seen your revenues and income,” matod ni Soco.
Si Soco mihulagway sa pag-budget nga susama sa pagplano sa panimalay: ang mga lider mahimong mosagop sa konserbatibo o agresibo nga pagbanabana, depende sa ilang agenda.
Dugang pa niya nga ang kanhi administrasyon ni Gobernador Gwendolyn Garcia mipili sa usa ka malaumon nga baruganan human sa pagrepaso sa projected income sa Probinsiya ug sa P14 bilyunes nga Annual Investment Plan (AIP) nga gigahin sa:
P3.8 bilyon alang sa health services;
P3.5 bilyon sa mga kadalanan ug mga taytaytan;
P3.3 bilyon alang sa bulk-water system nga giserbisyohan ang 25 local government units;
P1.25 bilyon alang sa gender and development; ug
P371 milyon alang sa disaster preparedness.
Giaprobahan sa Provincial Board (PB) niadtong Disyembre 2, 2024, ang 2025 budget kay 8.7 porsiyento nga mas taas kay sa miaging tuig nga P23 bilyunes, nga naghimo niini nga kinadak-an sa Probinsya hangtod karon.
Si Soco, kinsa nangulo sa committee on budget and appropriations atol sa deliberasyon sa miaging tuig, niingon nga ang maong lakang, legal ug may sertipikasyon gikan sa Local Finance Committee, PB approval ug review sa Department of Budget and Management. / CDF