Pabor si Cebu Vice Governor Glenn Soco sa plano ni Governor Pamela Baricuatro nga ihunong ang duha sa mga dagkong programa sa turismo sa probinsiya: ang Suroy Suroy Sugbo ug Pasigarbo sa Sugbo.
Sa interbyu niadtong Miyerkules, Hulyo 2, 2025, matod ni Soco nga ang Provincial Board bukas sa paghisgot ug posibleng pag-amendar sa mga relevant nga ordinansa aron mohaom sa mga prayoridad sa Gobernador.
Giklaro niya nga ang Suroy Suroy Sugbo ra ang gipaluyohan sa usa ka ordinansa nga gipasa kaniadtong 2012.
Ang Pasigarbo sa Sugbo sa laing bahin, wala’y balaod ug nagsalig ra sa tinuig nga gahin sa budget hinungdan nga ang pagpadayon niini usa ka desisyon sa executive.
“To me, we can support the Governor with respect sa atong legislative functions. Kay an ordinance can be amended, can be repealed,” matod ni Soco.
“Kanya-kanya man gud ang priority sa matag chief executive. If mao iyang priority, amo gyud nang tagaan ug pagtagad. I cannot speak for everybody, but it is something that we can discuss diha sa Provincial Board,” iyang gidugang.
Giangkon ni Soco nga bisan og wala pa niya hingpit ma-review ang ordinansa sa Suroy Suroy, tukion kini sa Provincial Board subay sa gisugyot nga direksyon sa Gobernador.
Unang gibutyag ni Governor Baricuatro ang iyang intensyon nga ibalhin ang pundo sa Suroy Suroy ug Pasigarbo atol sa iyang kampanya kaniadtong Nobiyembre 5, 2024.
Nisaad siya nga ipunting ang pundo sa healthcare, poverty alleviation ug uban pang importanteng serbisyo publiko.
Bisan pa sa giplano nga paghunong sa dugay nang mga programa, gipasalig ni Soco nga ang Provincial Board nagpabilin nga komitido sa pagpalambo sa turismo sa Cebu ug andam nga mosuporta sa alternatibong mga lakang nga isugyot sa Gobernador.
Sa pagkakaron, matod ni Soco nga wala pa siya’y detalyadong impormasyon bahin sa 2025 annual budget.
Ang Pasigarbo sa Sugbo gilusad kaniadtong 2008, usa ka festival competition sa tibuok probinsiya nga nagpakita sa lokal nga cultural nga kasaulogan sa mga LGU sa Cebu ug gihimo matag Agusto aron sa paghandom sa anibersaryo sa pagkatukod sa Probinsiya sa Sugbo. / Jeanette Arinque and Julie Anne Sajetarios, HNU Interns