Dili na mahinayon ang special election sa 3rd District sa Negros Oriental nunot sa giluwatan nga House Resolution 154 sa Ubos-Balay Balauranan sa Miyerkules, Nobiyembre 8, 2023.
Kini maoy gipahibawo ni Commission on Elections (Comelec) chairman George Garcia. Matod ni Garcia nga ang resolution nag-ingon nga ang eleksyon makaapekto sa peace and order sa dapit.
Gitakda na unta nga himuon ang special election sa Disyembre 9, 2023, diin ang Comelec nagsugod na sa pagpanawat og mga certificate of candidacy sa magpapili pagka kongresista human nabakante ang pwesto sa pagka taktak ni Kongresista Arnolfo “Arnie” Teves.
Si Teves gitumbok nga mastermind sa masaker sa balay ni anhing governor Roel Degamo nga nikalas usab og laing siyam ka mga kinabuhi.
Nagtago-tago na ang kongresista sa gawas sa nasod ug wala na mopakita sa hawanan sa Ubos Balay Balauranan bisan sa paghatag kaniya og kahigayunan nga mobalik ug panalipdan ang kaugalingon gikan sa mga akusasyon.
Si Teves nangatarungan nga duna siyay hulga sa seguridad.
Atol sa pagsugod sa pagpanawat sa Comelec sa COC, nigawas dayon ang ngalan sa kontroberysal nga si kanhi gobernador Henry Teves, igsuon sa kongresista.
Lakip sa miduso sa iyang COC mao si retired Colonel Reynaldo Lopez ug incumbent Bacong Mayor Lenin Alviola.
Human maka file silang Teves ug Alviola, nipagawas gilayon og pamahayag ang Comelec nga dili na mahinayon ang election. Nangandam na unta ang kapulisan sa lalawigan sa Sugbo aron mopadala sila og mga personnel sa Negros Oriental.