Wa gipaporma sa reigning champion Boston Celtics ang host team San Antonio Spurs og gipakaging kini 121-111 sa National Basketball Association (NBA) regular season game didto sa San Antonio, Marso 30 (PH time).
Ang all-around star nga si Jayson Tatum maoy mitimon sa Celtics pinaagi sa iyang 29 puntos, 10 ka rebounds ug walo ka assists para dalhon ang team sa ikawalo nga sunodsunod nga daog. Miabag si Jrue Holiday og 21 puntos, unom ka rebounds ug unom pud ka assists alang sa Boston.
Samtang si Luke Kornet mipabuhagay og 15 puntos ug 16 rebounds batok sa undersized Spurs. Pito sa walo ka Celtics players nga miduwa pulos nakahimo og double figures sa scoring. Si Keldon Johnson mitunol og 23 puntos samtang si Stephon Castle mihatag og 22 puntos alang sa Spurs, kinsa milukapa sa ikatulo nga sunodsunod nga pilde.
Ang San Antonio kay dunay rekord nga 8-13 sukad si Victor Wembanyama na-diagnosed og blood clot sa iyang tu'ong abaga nga maoy mitapos sa iyang season.
Doble ang kasakit sa Spurs kay nahuman pud ang season ni De'Aaron Fox tungod sa torn tendon sa iyang kumingking.
Ang Celtics naa sa ikaduhang pwesto sa Eastern Conference bitbit ang 55-19 (win-loss) nga baraha samtang ang Spurs (31-42) kulilat sa ug naa sa ika-13 sa Western Conference. / RSC