Nakabsan sa kinabuhi ang usa ka biyudo nga senior citizen human gituohang nalumos sa dagat Barangay Tungkop, Lungsod sa Minglanilla alas 8:30 sa buntag niadtong Agusto 3, 2025.
Giila ang biktima nga si Marcial Tapangan Cabalan, 67, ug residente sa San Juan, Barangay Inayagan, Naga City, Cebu.
Mga ala 1:22 sa hapon nakadawat ang Minglanilla Police Station og tawag gikan sa Naga Police mahitungod sa maong panghitabo hinungdan nga ila kining gisusi.
Sa imbestigasyon, nasayran nga katapusan kini nga nakit-an nga galakaw duol sa baybayon.
Apan giingong napalgan na lang kini sa ilang silingan nga ga-ubo nga galutaw sa kadagatan.
Ang anak sa biktima nga si Martin Cabalan, 41, gipahibalo sa ilang silingan sa gidangatan sa iyang amahan ug dali nga nisusi sa maong lugar.
Sa dihang nahaw-as ang lawas sa dagat, gisuwayan kini og tabang ug nakadesisyon ang kabanay nga dad-on sa Vicente Mendiola Center for Health - Infirmary sa Siyudad sa Naga apan gideklarar ang biktima nga dead on arrival.
Nasayran nga nag-antos sa sakit nga Alzheimer ang biktima ug way nakita nga ‘foul play’ sa kamatayon niini. / JDG