Gibasol ni Mayor Raymond Alvin Garcia ang gipulihan niyang administrasyon nga napakyas sa pagtubag sa hangyo sa mga barangay pag-aspalto sa ilang kadalanan.
Nagtipun-og karon sa buhatan sa mayor ang daghan kaayong hangyo sa mga barangay aron pag-aspalto sa ilang dalan.
Matod ni Garcia nga sa katapusang tulo ka tuig ubos sa miaging administrasyon, walay pagpang-aspalto nga nahitabo gawas lang sa South Road Properties (SRP) nga niresulta sa bati nga kondisyon sa kadalanan sa Cebu City. Ang pagpang-aspalto gihimo lang didto sa SRP kay mao man kini ang venue sa Sinulog 2023 ug 2024.
“For the last three years, the previous administration under the previous mayor did not asphalt any roads of Cebu City and that is the reason why bati kaayog conditions ang atoang Cebu City roads,’ matod sa mayor atol sa press conference niadtong Lunes, Enero 27, 2025.
Gipasabot ni Garcia nga ang kalangay sa pagpatuman sa pag-aspalto nagagumikan sa gidaghanon sa tawo nga motrabaho nga naglangkob sa lima ka team matag adlaw ug dili gyud madalidali. Matod sa mayor nga ang kalangay dili tungod sa bureaucracy, apan tungod sa kadaghan sa dalan nga aspaltuhon ug sa katas-on.
Gipasalig ni Garcia nga napalit na ang mga aspalto ug andam na kining ipatuman.
“We have about four to five teams to do that every day, but then kuwang gihapon. How many kilometers of roads we have here in Cebu City, 80 barangays, naa pay mountain barangays nga sak-unonon pa,” dugang sa mayor.
Ang SunStar Cebu nisuway sa pagkuha sa reaksyon ni kanhi mayor Michael Rama, apan walay tubag ang mga text message nga gipadangat. / JPS