GIPANALIPDAN sa kagamhanan sa Lungsod sa Santa Fe, isla sa Bantayan nga balido ang giluwatan nga Building permit sa Office of the Building Official ngadto sa Fifth Avenue Property Development Corporation niadtong Septiyembre 7, 2023.
Kini human giingong nakakompleto sa tanang rekisitos ug nakakuha og Environmental Compliance Certificate (ECC-OL-R07-2022-0417) ang The Stria.
Gipasabot sa kagamhanan nga ang Department of Environment and Natural Resources (DENR) Region VII nihatag sa Environmental Compliance Certificate (ECC-OL-R07-2022-0310) pinetsahan Oktubre 18, 2022, nga giamendahan sa ECC-OL-R07-2022-0417 niadtong Disyembre 15, 2022, ngadto sa Fifth Avenue Property Development Corporation alang sa “The Stria Project” nga diha tukuron sa F. Duarte St., Barangay Poblacion, Santa Fe, Cebu.
Giingong subay sa ECC, ang proyekto mo-cover sa total gross floor area nga 22,781 square meters, subay sa Building Plans nga gisumiter sa Office of the Building Official.
Apan ilang gidugang nga ang maong ECC wala maghatag og kondisyon o limitasyon sa gitas-on sa building.
Giaprubahan ang Municipal Ordinance No. 14-2023 niadtong Pebrero 28, 2023, nga nagtugot sa pagtukod sa proyekto basta motuman kini sa tanang environmental laws ug ordinances, ilabi na ang easements.
“Accordingly, these details and conditions served as the basis for the issuance of the building permit by the Office of the Building Official,” asoy sa LGU.
Samtang kabahin sa easement compliance, ang Bantayan Island Wilderness Area Coordinator unang nisusi sa site niadtong 2022 ug nitaho sa Protected Area Management Board sa Pebrero 17, 2022, nga ang planong development mahimutang gawas sa 20-meter easement zone ug nahisakop kini sa Multiple Use Zone nga giila sa General Management Plan. / ANV