Gideklarar sa Kagamhanan sa Dakbayan sa Lapu-Lapu nga ubos sa state of calamity ang Sityo Santa Maria, Brgy. Pusok nga naigo sa dako’ng sunog sa ala 1:30 sa hapon, Disyembre 12, 2023.
Nasayran sa Superbalita Cebu nga si Lapu-Lapu City Mayor Junard ‘Ahong’ Chan nikanselar sa Christmas party sa mga kawani sa dakbayan sa pagduyog sa kasub-anan sa mga biktima ug pagtunol og hinabang.
Base sa talaan sa Public Information Office (PIO) sa Lapu-Lapu, alas 5:00 sa hapon, Miyerkules, Disyembre 13, ang sunog nakaapekto sa 1,400 ka mga pamilya nga gilangkuban sa 7,870 ka mga indibiduwal.
Nikabat sa P3.1 milyunes ang danyos sa sunog nga niabot og 4th alarm.
Kini ang nasayran sa Superbalita Cebu sa imbestigasyon ni SF01 Walter Tello, chief investigator sa kabomberuhan sa Lapu-Lapu City.
Sa pagkakaron, kadaghanan sa mga biktima gipahiluna sa plaza ilawom sa tiilan sa Marcelo Fernan Bridge ug Mactan Mandaue covered court sa Pusok.
Pipila nibalik sa dapit nga nasunogan, ang uban nanaglinya sa Pusok barangay hall aron pagpangayo og residence certificate aron pagpamatuod nga sila lumolupyo sa maong dapit nga naigo sa sunog.
Apan namatikdan sa Superbalita Cebu nga daghang naapektuhan nga di mga residente sa dapit apan nanag-abang sa mga balay kay nagtrabaho sa dakbayan.
Si Pusok Brgy. Kapitan Ranie Godinez Emperio, nahinabi sa SunStar Cebu online program, nanawagan sa dunay malumo og kasingkasing pagtabang sa mga biktima sa sunog.