GIHAN-AY na ang mga pamaagi alang sa seguridad, traffic situation ug crowd control atol sa ipahigayon nga selebrasyon human sa pagpanumpa ni Governor-elect Pamela “Pam’’ Baricuatro sa Hunyo 30, 2025.
Gipahibawo sa Inauguration committee ni Baricuatro pinaagi ni Ruben Licera nga nakigtigum na kini tali sa kapulisan alang sa pagsiguro sa seguridad sa mga bisita ug mga opisyal atol sa maong higayon lakip na ang mga supporters niini nga gilaumang modagsa atol sa ipahigayong street party.
Subay sa inisyal nga plano pinangulohan ni Cebu Provincial Police Director PCol. Jovito Atanacio, gipangandaman sa kapulisan ang pag-deploy sa mga police personnel sa gibana-bana nga moabot sa 15,000 ka mga tawo.
“We are deploying all necessary resources to ensure a peaceful and organized event,”matod ni Atanacio.
“This includes pre-event area sweeps, contingency response plans, and real-time command coordination,” dugang niya.
Ang inauguration sa Hunyo 30, sundan sa interfaith thanksgiving gathering ug street party.
Gipasabot sa sakop ni Licera nga ilang himuon ang usa ka simple apan mahinungdanon nga selebrasyon alang sa mga Sugboanon.
“Governor Pam has consistently reminded our team that this event must reflect the values of simplicity, gratitude, and public service,” matod ni Licera. / ANV