Si Cordova Mayor Cesar “Didoy” Suan mao ang napili nga presidente sa League of Municipalities of the Philippines (LMP) Cebu chapter niadtong Biyernes, Agusto 8, 2025.
Ang piniliay nahitabo sa Seda Ayala Center Cebu.
Matod sa Cordova Public Information Office (PIO), si Suan ang nag-inusarang nominado sa maong posisyon, kinsa nakadawat og suporta gikan sa 43 sa sumatotal 44 ka mga municipal mayor sa probinsiya.
Siya maoy nipuli kang kanhi Daanbantayan Mayor Sun Shimura, nga karon nagrepresentar sa 4th District sa Sugbo.
Sa managlahing kalambuan, ang Representante sa Segundo Distrito sa Dakbayan sa Sugbo nga si Eduardo “Edu” Rama Jr., maoy nahimong Deputy Majority Leader sa 20th Congress.
Sa post sa Facebook page sa opisina ni Rama niadtong Huwebes, Agusto 7, gipahibalo ni Rama ang appointment sa usa ka post sa social media niadtong Huwebes, nga namahayag sa iyang pasalamat.
“Mapasalamaton ta sa atong mga kauban sa House of Representatives sa pagsalig nga gihatag kanako isip Deputy Majority Leader sa ika-20 nga Kongreso,” matod ni Rama.
“Uban sa Segundo Distrito sa Sugbo, magpadayon kita sa pagserbisyo ug sa pagpaluyo sa mga palisiya nga makapaayo sa kinabuhi sa tanang Pilipino,” dugang niini. / CDF