NASINATI sa mga residente sa Barangay Subabasbas, Siyudad sa Lapu-Lapu, ang grabeng kakuwang sa suplay sa tubig sulod sa pipila ka adlaw, hinungdan sa kabalaka sa mga opisyal sa barangay.
Gikumpirmar ni Kapitan Ruben V. Patigdas nga daghang kabalayan ang walay agas ilang gripo sulod na sa pipila ka adlaw.
Napugos ang barangay sa pagkuha og tubig gikan sa ubang dapit aron lang matubag ang ilang batakang panginahanglan.
Gibanabana nga 5,000 hang-tod 8,000 ka mga lumolupyo ang apektado.
Gidayeg ni Patigdas si Congressman Junard “Ahong” Chan sa iyang dali nga paglihok ug pagtabang sa paghatod og tubig gamit ang mga water truck kaniadtong Miyerkules ug Huwebes. Nitabang usab ang silingang Maribago sa paghatod og tubig.
Matod ni Patigdas, ang pagkabalda sa suplay sa tubig naggikan sa problema sa kuryente nga nakaapekto sa tinubdan sa tubig nga gidumala sa Mactan Rock Industries, usa ka supplier sa Metropolitan Cebu Water District (MCWD).
Kon walay kuryente, dili makabomba og tubig ang mga deep well.
Bisan kon nibalik ang tubig sa ubang lugar mga alas 5 sa hapon kaniadtong Huwebes, dili gihapon stable ang suplay.
Ang uban duha ka oras ra kada adlaw makakuha og tubig, ang uban wala gihapon hangtod karon.
Dugang sa problema ang nagkadaghang panginahanglan gikan sa bag-ong natukod nga mga subdivision sa lugar. / Yvon Maratas, Benedicto College Intern ug Dane Riechel Oja, VSU Intern