Gikulata og maayo ni kanhi world title challenger Regie “The Filipino Phenom” Suganob sulod sa 12 ka rounds si Venezuelan knockout artist Ronald Chacon sa iyang dominanteng unanimous decision nga kadaugan sa main event sa “Kumong Bol-anon XII” card sa PMI Bohol Boxing Promotions niadtong Sabado sa gabii, Nobiyembre 4, 2023, sa Bohol Wisdom Gymnasium sa Tagbilaran City.
Sa kadaugan, naangkon ni Suganob ang bakanteng World Boxing Organization (WBO) Global light flyweight title.
Nidominar si Suganob sa scorecards sa tulo ka judges. Sila si Martino Redona ug Edward Ligas parehong nitali og 119-108 samtang si Neil Papas nipatik og 120-107, tanan alang sa lumad nga taga Dauis, Bohol ug kanhi sakop sa nabungkag nga ALA stable sa Cebu.
Sa tanang rounds, bugtong sa 2nd round ra nagamit ni Chacon ang kakusog sa iyang kumo dihang iyang napabarag si Suganob pinaagi sa iyang left counter.
Apan human niini, nipatigbabaw na ang kalantip sa abilidad ni Suganob.
Sa 4th round, nakapuntos og knockdown si Suganob dihang iyang napaluhod si Chacon pinaagi sa iyang right hook nga niigo sa nawong sa bisitang boksidor.
Human niini, giataki na sab og maayo ni Suganob ang bodega ni Chacon.
Sa 6th round, nagpauwan og body shots si Suganob apan adunay higayon nga nireklamo si Chacon ni international referee Danrex Tapdasan nga naigo siya og foul blow.
Nahunong kadyot ang away niadtong higayuna ug gipasabot ni Tapdasan si Chacon nga pulos legal body shots ang niigo kaniya unya nikalit lang pagluhod si Chacon.
Tataw nga nasakitan na sa bodega si Chacon, hinuon wala ra kini gitawagan og knockdown ni Tapdasan.
Sa pagpadayon sa away, nagsige na lang og atras-atras si Chacon aron malikayan ang dugang kastigo hangtod nahuman ang away.
Taliwala sa iyang impresibong kadaugan, nagkanayon si Suganob nga daghan pa siyang angayang palambuon sa iyang abilidad.
Si Suganob nisaka sa 14-1, 4KOs nga rekord samtang si Chacon natagak sa 30-3-1, 22KOs nga baraha.
Ang manager ni Suganob nga si PMI Bohol Boxing Promotions head Floriezyl Echavez Podot nagkanayon nga depensaan una ni Suganob ang iyang WBO Global title una niya kini pahamagon pagbalik alang sa world title, partikyular ang WBO light flyweight belt.
Sa co-main event, nirehistro si Christian Balunan (9-0, 5 KOs) og 3rd round knockout nga kadaugan batok ni Thai Adetip Maungcharoen (5-1, 3 KOs) aron angkunon ang WBO Asia-Pacific minimumweight belt.
Si Balunan, kinsa taga Consolacion, Cebu, nibuhi og right straight aron tumbahon si Maungchareon sa ika 2:17 minutos sa 3rd round nga maoy nagtuldok og sayo sa away.
Sa laing mga sinukmagay, ningdaog sila si Gerwin Asilo batok Jerry Pabila (KO 2), Shane Gentallan batok Johnro Taneo (KO 3), Reymart Tagacanao batok Jason Mopon (KO 8), Casey Morton-Croft batok Arisara Wisetwong (KO 2), Althea Shine Pores batok Charimae Salvador (UD), Sugarey Leonard Pores batok Jayfe Mabale (TKO 2), Richard Laspoña batok Steven Lagrama (UD), ug Cebu-based Polish boxer Patrick Rosiak batok Ralph David Gemino (2 TKO).