Gipasidan-an sa Philippine Atmospheric, Geophysical, and Astronomical Services Administration (Pagasa), ang publiko nga ang Sugbo makasinati og mga pag-uwan-uwan tungod sa cloud cluster sulod sa Philippine Area of Responsibility (PAR) nga nagpakita og potensyal nga mahimong usa ka low-pressure area (LPA).
Ang cloud cluster nagpasabot sa usa ka pundok sa mga panganod nga naporma sa usa ka rehiyon nga kasagaran nagpakita sa posibilidad sa pag-usab sa panahon.
Kining mga cluster kasagaran gihulagway sa pagdaghan sa kaumog ug way klaro sa atmosphere nga mahimong moresulta sa pagkaporma sa usa ka LPA.
Matod ni Jhomer Eclarino, weather specialist sa Pagasa niadtong Martes, Hulyo 15, 2025, nga ang habagat inubanan sa naporma nga LPA, gipaabot nga magdala og panagsa nga kusog nga ulan sa Sugbo ug sa ubang bahin sa nasod.
Dugang ni Eclarino nga ang cloud cluster gipaabot nga mahimong LPA sulod sa semana.
Kon molig-on ang sistema sa panahon, adunay 50 porsiyento nga kahigayunan o ubos ngadto sa kasarangan nga posibilidad nga kini mahimong usa ka tropical cyclone.
Sa higayon nga mahitabo , kini ang ikatulong tropical storm nga maporma sa Pilipinas karong 2025, sunod sa Auring ug Bising.
Kon molig-on , tawgon kini og “Crising.”/ DPC, Hulagway kuha ni Juan Carlo De Vela