Sugilanon: Ang babaye sa kawayanan

Sugilanon: Ang babaye sa kawayanan

JESSABELE G. BENTAZAL
Boljoon, Cebu

Naa na pod siya! Tago! Tago!” singgit sa babaye nga nagadu­long nako. Naglibog ko kon kinsay ka-estorya aning babaye’ng naa sa mga trayenta ang pangedaron. Siya si Mayang. Mikaratil siyag dagan. Hapit ko niya hibanggai. Unsa kahay iyang gikahadlukan? Nagsiyagit siya, “Dagan, Day! Tago!”. Wala ko lang kaayo siya panumbalinga kay duna man god kuno na siyay problema sa pangisip. Apan kon tan-awon si Mayang, seksi ug guwapa ra ba unta kon tarungon lang niya’g han-ay iyang buhok ug pamiste. Unsa kahay nakaingon sa pagkaliso sa iyang utok?

Kilumkilom na nga gisugo ko ni Tiya og mantika ug asin sa tindahan ni Nang Benida. Mipaspas kog lakaw kay basig hilambusan na pod kog bakos aning kalakiha kon dugay kong mahibalik, kay nihapit pa kog lili sa TV nilang Minda god, pagkaninduta gyod sa salidang kingkoy-kingkoy. Unya ang huhungihong sa among mga silingan, alab­tanan kuno nang dapit igdayong liko sa pangpang, kanang naay labong kaayong kawayanan, nga kahibulo­ngan kaayo’ng naa sa pangpang gyod pod nagtapot ang mga kawayan. Dakong kahibulongan ug hangtod karon wala gyoy nakatubag kon ngano.

“Bekay! Bekay!” May mi­sangpit sa akong ngalan. Patay! Mao na gyod seguro ni ang ilang giingon nga abat. Apan, dili baya ko motuo kon dili ko makakita.

Nagkaduol ko sa kawayanan, nagkakusog usab ang tingog nga akong nabatian.

Nahinumdom ko sa gi­asoy sa una sa akong apohan nga si Nanay Nating bahin sa kawayanan sa pangpang. Diha kuno gitambog sa pangpang ang mangangayam nga si Juan-tulingi sa usa ka nag-maskarang tawo nga hangtod karon nahimo’ng tinubdan nga aduna gyoy abat dihang dapita, nga mokalit lang og pamira og tawo aron dad-on sa paraiso sa dili mga dili-ingon-nato nga nagpuyo sa kawayanan. “Basig buhi si Juan-tulingi? Basig gikabig lang ang iyahang espirito ug naa siya anang dakong kahoy karon?” mao kiniy pagtuo sa kadaghanan.

“Tinuod kaha ang giingon ni Mayang nga kinahanglan kong modagan ug motago?” matod sa akong huna-huna. “Ang estorya ni Nanay Nating tinuod ba?”

Nag-rambol pag-ayo ang akong huna-huna. Buot kong matubag diha-diha dayon ang akong mga pangutana.

“Ahhh, kadakong binuang!” Kusog ko nga misinggit. Nahimuot ko sa akong kaugali­ngon kay mora kog ‘superhero’ sa salida nga di mahadlok sa mga kaaway. Apan diay, nahadlok ko’g gamay kay basi’g tinuod nga naay managit og tawo sa kawayanan, unya ang patay kong lawas na lang ang makit-ang nahatulandos sa ubos sa pangpang. Dili pa ra ba ko gustong mamatay kay wala pa nako igkita ang akong matuod nga inahan.

“Bekay! Bekay!” Nabati ko na pod ang tingog.

“Kon tawo ka, pakita! Kon abat ka, pahawa! Puyra gaba! Tuhe. Tuwe. Tuwe! Mibalos ko pagsinggit dungan ang pagsapyag sa asin nga akong gibitbit, ug pagtalutho sa akong palibot. Uy, patay! Hilambusan gyod kong Tiya. Nahurot ang iyahang asin.

“Bekay! Yangod! Ako kini. anak!” sangpit sa linalang didto sa kawayanan.

“Anakihi ka god, uy! Unggoy ang akong ina...” Naputol ang akong pagyawyaw sa dihang nakita nako ang babayeng nahisalang-at sa kawayanan. Naglupad-lupad ang iyahang taas nga buhok duyog sa pag­huros sa hangin. Nagbistida siyag puti. Guwapa siya. Nahinumdom ko sa karaang litratong akong nakaplagan nga gipalupi sa karaang almanake ni Tiya. Pareha silag panagway. Parehas pod ang gisul-ob. Siya ang akong inahan? Pangutana nga didto sa akong hunahuna. Naglibog na ko pag-ayo. “Dili mahimo! Dili kini tinu­od! Damgo ra ni!” mikusog ko pagsinggit samtang nahilukapa sa yuta ug nagsud-ong sa nagkahanaw nga panagway sa maanyag nga babaye.

“O, bitaw! Magdamgo ka rog sibukaw kon hilapdosan tikag bakos! Alas singko pa tikang gisugo’g mantika ug asin, unya unsa na man rong orasa? Mahuman gyod kos akong lutuonon karon!” nagyawyaw si Tiya.

Miyahat ko gikang naghukdong sa lamesang akong nakatulgan samtang nagkupot sa litrato sa maanyag nga babaye. “Tiya, si Nanay Nating...siya diay ang akong inahan?”

Milugmaw ang luha sa a­­kong iyaan nga miyango.

(KATAPUSAN)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph