Sugilanon: Ang puto ni Maria

Sugilanon: Ang puto ni Maria
Sugilanon

ANGELIE B. OLIVEROS
Nangka, Boljoon Cebu

USA ka adlaw dihay usa ka babaye nga Maria ang pangalan nga namaligya og puto-maya. Iya kining gilibod sa ilang dapit aron mahalin ug siya makakuwarta. Apan miabot na lang ang kahapunon, ang iyang halin bayenti-singko pesos ra gyud intawon. Wala na siyay laing mahimo kundi iya na lang kining gipautang sa iyang mga silingan.

Pagka ugma namaligya gihapon si Maria og puto bisan sa kainit sa adlaw. Gipaningot siya samtang naglakaw sa dalan. Karon ug unya, mohunong siya ug mopasilong sa landong sa kabalayan nga iyang maagian. Naningil usab siya sa mga nangutang sa iyang puto, apan siya gibalibaran kay kuno wala pa silay ikabayad. Iyang gipadayon og libod ang iyang puto, apan bayenti-singko pesos lang gihapon ang iyang halin. Iya na pod kining gipautang sa mga silingan kaysa mabahaw ug dili na hinuon kapahimuslan. Lagmit, higabaan pa siya sa Ginoo. Na-ampo pod siya sa Ginoo nga sa mosunod nga mga adlaw modako-dako na ang iyang halin ug modako-dako pod ang iyang ganansiya.

Nianang pagka gabii wala dayon mahikatulog si Maria. Naghinuktok siya. Naghunahuna siya kon unsa ang angay niyang buhaton aron mahalin ang iyang baligya nga puto-maya. Misantop sa iyang hunahuna nga pakapinan niyag kamay ang puto-maya nga iyang ibaligya.

Pagka sunod adlaw namaligya gihapon si Maria og puto-maya nga may pakaping kamay. Ug iya kining gisuroy sa kabalayan sa ilang dapit.

Sa dihang mobalik na unta si Maria sa iyang agi kay diyutay ra ang namalit, usa ka hamtong nga lalaki ang miduol kaniya ug miingon, “Ayaw pagpakawala og paglaom, Inday! Ang Diyos motabang sa mga buotang tawo. Padayon!” Ang nagbitbit og upat ka manok himungaan nga hinigtan ang mga tiil.

“Asa ka padulong, Ma­nong?” pangutana ni Maria.

“Adto sa merkado sa lungsod, Inday. Iyawat mahalin ki­ning akong mga manok aron duna koy ikapalit og bugas,” matod sa tawo.

Si Maria natingala kay wala man siya makaila sa tawo nga mipadayon sa iyang paglakaw. Ginuntan sa iyang mga mata ang maong tawo hangtod nawala kini sa iyang panan-aw. Mopadayon unta siya pagbalik sa iyang agi, pero nakaamgo siya nga mopadayon na lang sa pagsuroy aron mahalin ang iyang gibaligyang puto-maya.

Hapon na. Hapit na mosalop ang adlaw sa kasadpan. Miuli si Maria nga saya ang nawong ug dala ang usa ka matam-is nga pahiyom, tungod kay ang iyang baligya nga puto-maya nga gipakapinan og kamay nahurot og kahalin. Sa pagpaningil sab niya sa mga utang sa iyang mga silingan gibayran pod siya. Si Maria nahinuklog nga naghunahuna nga wala diay imposible kon imong ipadayon ang panaw sa imong kinabuhi, basta may paglaom ka nga molampos.

“Padayon!” nahinumdom siya sa tambag kaniya niadtong tawo nga nasugatan niya sa dalan usa ka higayon niana samtang naglibod siya sa iyang puto. (KATAPUSAN)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph