JOHN TAM. YBAÑEZ
Gun-ob, Lapu-Lapu City, Cebu
DAAN nang nagpakita og dautang tilimad-on ang panahon sa wala pa mogikan ang M/V Super Ferry sa dungguanan sa Manila paingon sa Sugbo. Apan tungod sa taho sa PAGASA nga dili angayng kabalak-an ang kahimtang sa panahon, mitugot ang ‘coast guard’ nga makabiya sa puwerto ang barko ganinang alas siyete sa sayong gabii.
Karon nga naglawig na ang barko taliwala sa lawod, misamot pagkimot ang panahon. Nag-umido ang kangil-ad nga gipakita sa kinaiyahan. Kusog kaayo ang hangin ug ulan. Ang barko gipuli-pulihan pagdagmal sa dagkong bawod. Bisag dakong barko ang M/V Super Ferry, gitay-og gihapon kini sa nagpungasing mga balod.
Sa hilom gibatig kabalaka si Dina nga usa sa mga pasahero sa barko. Kon simbako madisgrasya ang barko, siya gayod tingali ang unang mamatay kay dili man siya mahibalong molangoy. Naatol pa gyod nga gabii ang ilang pagnabigar.
Wala siya mahimutang sa teheras. Mohigda, mobangon ug molakaw-lakaw. Sa hilom, nangaliya siya sa Kahitas-an nga wala untay mahitabo ning iyang panaw.
“Miss...” Naigking si Dina pagkabati sa tingog sa usa ka lalaki. Mao pa lang gayoy iyang pagkahuman sa hilom nga pag-ampo sa Ginoo. Milingi siya sa likod sa pagtuo nga siyay gisangpit sa tawo. Usa ka ambungang lalaki ang iyang nakita nga naglingkod sa teheras dili layo sa iyang teheras.
“Kaganina ra kong nakamatikod nimo, Miss,” matod sa lalaki. “Ingon sa wa ka mahimutang.”
“Nabalaka ko ning atong biyahe,” miligdong ang nawong ni Dina. “Dagko kaayo ang mga bawod. Tingalig...”
“Wa kay angayng kabalak-an, Miss,” sakgaw sa lalaki. Natural nga hangin lang ang nakaingon sa maong mga balod. Walay bagyo.”
Wala na motingog si Dina. Apan didto sa iyang kahiladman nagpabilin pa ang kabalaka.
Wala madugay, nakig-ilaila ang lalaki kaniya. Alvin Dayanan ang gipaila kaniya nga taga Lutopan, Toledo City. Mipaila usab ang dalaga sa tawo nga daw buot makighigala kaniya. Iyang gitug-anan si Alvin nga taga Bulacao, Cebu City siya.
Kadali ra silang nagkasuod. Milahutay ang ilang kulukabildo. Ingon sa nalingaw si Dina sa pakighinabi kang Alvin ug daw napapas ang iyang kabalaka sa dautang panahon.
Apan kalit lang may milagubo nga nakapakgang sa naglami nga panagsultianay nilang Dina ug Alvin. Morag napandol ang M/V Super Ferry. Napawong ang mga suga ug mihugpa ang kangiob. Unya kalit mitublaw ang nagkamaad nga tingog sa mga pasahero nga gigamhan sa tumang kalisang. May nagpahibawo nga nabanggaan sila sa usa ka ‘oil tanker.’
“V-Vin, u-unsay atong buhaton niini?” nahapagunit si Dina sa bukton sa lalaki dihang iyang namatikdang mitakilid ang barko.
“Kalma lang,” ni Alvin pa.
Wala madugay, dihay nagdinaganay nga nagbitbit og flashlight. Sa maong higayon, ang tubig misugod nag sulod sa barko.
“A-Alvin,” tungob sa kabalaka ang tingog ni Dina.
“Ayaw kahadlok,” alam-alam ni Alvin. “Kon unsa may mahitabo, dili ko ikaw pasagdan...”
Gimando sa kapitan ang pagpabiya sa barko. Daling nakakuha si Alvin og duha ka life jacket alang nilang Dina. Unya igo lang nilang nasul-ob ang life jacket, ilang nasigpatan ang pag-ariya sa life boat sa barko. Nag-ilogay pagsakay ang mga pasahero.
Gigunitan ni Alvin ang kamot ni Dina ug misunod sila niadtong tawo'ng nagbitbit og flashlight paingon sa bote nga naglutaw sa dagat. Apan usa ra kanila ang nakasakay kay husto na sa kapasidad. Giseguro ni Alvin pagpasakay si Dina nga nahingawa kaayo sa iyang kahimtang.
“Ayaw kabalaka nako, Din, kay tungod nimo, balibaran ko ang kamatayon!” sa lalaki pa. (KATAPUSAN)