Sugilanon: Gugmang hinampak

JOSUA RONMIEL ERAS
481 Katipunan St., Labangon, Cebu City

SA PAGBALIK nako sa Pinas, naka-desisyon ko nga dili na ko mag-OFW. Ako na ipadayon ang akong pangandoy na mahimong abogado. Nagkuyog mi sa akong espisyal nga amiga paingon sa Lapu-Lapu City aron mag-inquire kon unsay pamaagi sa pagpa-enroll sa kursong abugasya sa sikat nga Law School sa Lapu-Lapu. Sa tunga-tunga sa among biyahe mibundak ang uwan. Dali-dali mi nga mipasilong sa usa ka ‘convenience store.’ Mipalit kog mainom para namong duha. Sa akong pag-linya, naglalis ang duha ka guwapa nga dalaga bahin sa ilang mga pares. Igo ra ko nagpahipi sa ilang likod samtang naglinya sa ‘counter.’

Miingon ang kyut, gamayon ug pution nga dalaga, “Kon mamili man gani kag lalaki, Day, dapat naay trabaho ug kwartahan para pud naay mogasto sa inyong deyt. Dili ikaw ang mogasto. Lalaki dapat mogasto, dili ang babaye.”

Mitubag ang seksi, taason, ug chinita nga babaye, “Kalain anang ang lalaki pirme maoy pagastuon, uy! Abi pa lang di ta ‘independent woman.’ Wa koy problema kon estudyante akong uyab, basta importante kugihan ug naay pangandoy sa kinabuhi.”

“Day, hapit na ta mag-trayenta. Dapat mamili kag lalaki nga ‘stable’ kay aron inigtukod og pamilya di na maglisod,” matod sa kyut nga babaye.

Miisa ang kilay sa chinita daw wa kauyon sa gisulti sa iyang higala. “So, gusto ka og built nga lalaki? Kanang successful ug kwartahan bisan wa ka na in love niya?” daling mitubag ang iyang higala.

“Oo, uy! Sa panahon karon dapat mag-praktikal ta. Di ta mabusog anang puro gugma lang,” sulti sa kyut nga babaye.

“So, kon mao man gani na imong gusto, unsa man sad imong ika-offer isip baylo sa iyang pagka achiever? Imong beauty ug lawas? Samtang siya nag-ani sa bunga sa iyang paningkamot, unya ikaw nakigsalo sa iyang hinaguan! Di ba unfair kaayo sa iyang bahin?”

Mingisi ko sa likod sa chinita ug nakauyon ko sa iyang tubag, apan naghuwat ko kon unsay tubag sa iyang higala. Miduko ko sa akong ulo samtang nagkupot sa selpon ug kunohay adunay ka-chat bisan gilangaw ang akong ‘Messenger.’

“Dili man na unfair, Day. Kay kon mag-minyo mi, ako man sad mo-atiman sa among pamilya ug dili intawon lalim magpadako sa mga bata ug mo-serbisyo sa bana,” matod sa kyut nga babaye.

Nahimong thrilling ang ilang panagtabi hinungdan nga miabante kog gamay paingon kanila aron makasusi og maayo. Miundang og kadali sa pag-chat ang chinita ug mitubag,

“Day, para nako mas maayo kamong duha sa imong pares maoy maningkamot ug magtinabangay para sa inyong relasyon. Dili magsalig sa kwarta ug na-achieve sa lalaki, kay basin kon ma-dependent ka sa lalaki, mabuyboyan unya ka. Mas maayo naa sad kay imong own earnings.” Miyango ko sa buot ipasabot chinita.

“Day, nindot man nang mo-serbisyo sa pamilya pero sa akong nakat-unan sa akong relasyon, mas ganahan usab ang lalaki nga mahatagan sila og peace of mind sa relasyon. Kon mahatag na nimo, panggaon ug higugmaon gyud ka sa imong lalaki,” matod sa chinita.

Gusto pa unta ko maminaw sa ilang panagtabi apan ni-chat na akong espisyal nga amiga. Giuhaw na kuno siya. Busa miingon ko sa duha ka babaye, “Miss, kamo na sunod.”

Milingi nako ang duha ka babaye ug gitutokan kog maayo. Dihang mobayad na ko sa cashier, mihinayhinay og padaplin ang mga guwapang dalaga ug nagpamaak ang kyut nga dalaga sa iyang ngabil.

“Day, parehas silag nawong ni JM de Guzman,” sulti sa chinita.

Tungod sa akong kaulaw, dali-dali kong gihipos ang akong pitaka ug gisulod dayon sa ‘eco bag’ ang akong gipamalit.

“JM... JM de Guzman, ikaw ba yan?” paagpas sa kyut nga dalaga.

Igo ra kong milingi nilang duha ug nagpa-kyut nga mipahiyom, dayong gawas paingon sa akong amiga.