Sugilanon: Hilo para kang Alexis

Sugilanon: Hilo para kang Alexis

LAMBERTO G. CEBALLOS

Ilaya, Cawayan, Dalaguete, Cebu

NAG-ABOT sila si Karlo ug Vivian sa usa ka motel nga nahimutang sa hilit nga dapit sa dakbayan nianang gabhiona. Human sa ilang pagtagay sa kinawat-kawat nga kalipay, nanghigda sila nga naghabol sa hubo nilang mga lawas. “Love, nus-a kaha nga di na ta magtago-tago sa atong pagminahalay?” matod ni Vivian. “Hadlok baya ko nga masakpan ta unya ni Alexis, imong asawa.” “Ayg kabalaka ana, Love. Magbantay lang ta. Nitawag ko niya ganiha sa selpon nga mag-obertaym ko,” ni Karlo nga mihapuhap sa buhok ni Vivian.

“Kon wa pa unta si Alexis, hingpit unta ang akong kalipay uban nimo, Love!”

Sa pagkadungog ni Karlo sa mga pulong ni Vivian, kalit nga misantop sa iyang hunahuna ang usa ka paagi nga mawala sa iyang kinabuhi si Alexis. Wala pa silay anak bisan duha na ka tuig silang kasal. Sukad nga gikaila niya si Vivian nahigugma siya niini ug sa inanay nawad-an siyag gugma kang Alexis. Wala niya sultihi si Vivian sa iyang nahunahunaan.

Dihang nahiuli na si Karlo sa ilang balay naabtan niya si Alexis nga may gika-estorya sa selpon. “Kinsa to?” ni Karlo. “Si Darren to, akong ig-agaw. Nangumusta nato. Ako giingnan nga okey ra ta, bisan wa pa tay anak,” tubag ni Alexis nga migakos sa iyang bana ug mihalok sa ngabil. “Unsa man, sukaran tika, basig gigutom ka?”

“Timplahi lang kog kape,” ni Karlo nga milahos sa ilang lawak aron mag-ilis og sapot alang sa balay. Human migawas siya sa sala ug milingkod sa sopa. Diha na ang mug sa kape nga gibutang ni Alexis sa center table. Milingkod si Karlo sa sopa tupad ni Alexis.

“Kumusta imong obertaym, Hon? Di ba stressful?” ni Alexis.

“Okey da man. Ang report na lang akong tiwasonon,” ni Karlo.

Sa ila nang pagpangatulog nagpasabot si Alexis nga nagkinahanglan siya sa pagmahal ni Karlo, apan mibalibad kini kay gikapoy kaayo siya.

Usa ka Dominggo sa buntag sayo nga nagmata si Karlo, Si Alexis natulog pa. Si Karlo ang nagluto para sa ilang pamahaw ni Alexis. Sa pagmata ni Alexis hinay siyang milakang paingon sa kusina. Nakita niya nga nahuman nag andam si Karlo sa ilang pamahaw. Wala siya mo-diretsog sulod sa kusina; nagpahipi siya sa kilid sa pultahan. Nakita niya nga nagtimpla si Karlo og kape sa mug nga habig sa naandan niining puwesto sa lingin nga lamesa. Sunod nakita niya kini nga nagtimpla og kape sa lain nga mug nga diha sa naandang dapit ni Alexis sa lamesa, apan nabatyagan ni Alexis nga may gibutang si Karlo sa maong mug. Nagduda siya; mikuba-kuba iyang dughan. Unya midali siya sa pagpasalipod sa palid sa pultahan. Si Karlo milahos sa banyo. Dali nga misulod si Alexis sa kusina ug gibaylo ang duha ka mug. Didto na sa puwesto ni Karlo ang mug nga alang unta kaniya (Alexis). Nagdali si Ale­xis nga mibalik sa ilang lawak. Sa paghiagi niya sa banyo wala pa mogawas si Karlo.

Taudtaod nabati ni Alexis ang tawag ni Karlo, “Dali na, Hon, mahaw na ta. Basig mabugnaw na unya ang kape!” “Moanha na ko, Hon!” tubag ni Alexis.

Mikuha si Alexis og duha ka hiwa sa sliced bread ug gibu­tangan og ham ang taliwa niini. Gitan-aw siya ni Karlo nga miingkib sa sanwits. Mikuha sab si Karlo og duha ka hiwa sa pan ug gipahiran og peanut butter. Miingkib pod siya sa iyang sanwits nga nagpasiklap kang Alexis nga mipunit sa mug ug midimdim. “Lami gyud ka motimplag kape, Hon,” ni Alexis nga nagpahiyom. Mibawos pagpahiyom si Karlo. Nagpadayon sila pagpangaon. Karon ug unya mohigop si Alexis sa kape. Sa iyang bahin, gihurot ni Karlo pag-inom ang iyang kape human niyag kaon sa iyang sanwits. Pagka taudtaod nabatyagan ni Alexis nga misulirap ang mga mata ni Karlo.

“Hon, nganong buot mo akong hiloan?” ni Alexis nga namula ang mga mata sa kayugot.

“Pa-pasayloa k-ko, Honnn, kay na-nnaka-s-ssala ko n-nimo. N-Naglu-luib ko,” putol-putol nga mga pulong ni Karlo. “P-Please, c-call an ambbbulance!”

Wala mokihol si Alexis. Gitan-aw lang niya si Karlo nga nagpakiluoy ang nawong hangtod nga mituay ang ulo niini, Didto sa mga mata ni Alexis may pipila ka lusok sa luha nga misubay sa daganasan sa iyang mga aping.

(KATAPUSAN)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph