Sugilanon: Just once

Sugilanon
Sugilanon

BUGNAW ang kahapunon. Ang hangin nga gikan sa lawod nga misugat nako wa makakunhod sa talagsaong kainit sa panahon.

Hapon na tuod pero namilit pa ang dinagaang sa alisngaw nga gibuga sa kinaiyahan.

Nalantaw ko sa unahan ang usa ka binuhat nga sinati ko na nga nagtalikod nako samtang naglingkod sa ‘seawall’ sa ‘reclamation’ sa among dapit, nag-atubang siya sa lawod ug sa iyang pamayhon natugkad ko nga duna siyay lawom nga gihunahuna.

Siya ang akong tuyo sa pag-anhi ko karon aning lugara.

Miginhawa kog sagunson. Unya giduol ko siya.

“Ganina ka ra ba?”matod ko.

Milingi siya nako dayong tindog.

Nagtinutokay kami. Ligdong ang iyang nawong.

Sa napulo ka tuig nga wa mi magkita, wa siya mausab sa akong pagtan-aw.

Nagpabilin siyang guwapo ug himsog ang panglawas.

“Bag-o pa lang, Clarisse.”

Milingkod ko sa ‘seawall’ ug milantaw sa lawod.

Milingkod siya tupad nako. Dinhing dapita kami unang nagkahimamat.

Ug dinhing dapita sab nga gidaygan ko sa iyang pagbati. Dinhing dapita sab nga gidawat ko ang iyang gugma. Apan trayinta ka tuig na kadto. Karon hapit na kami motungtong sa pagka ‘senior citizen.’

“Nganong gipaanhi mo ako karon dinhi, Ramil?” Nagpabilin kong naglantaw sa lawod.

“Gusto kong handumon kining lugara nga nia ka sa akong kiliran.”

Nakalingi ko niya.

Nagpabilin nga ligdong ang iyang nawong, mao sab ako. Nagkatinutokay kami.

Unya nagkadungan kami sa pagginhawa og lawom.

“Nakahinumdom ka pa diay sa kasaysayan sa atong kinabuhi dinhing lugara, Ramil? Sa atong gugma ug sa imong mga panumpa nako?”

“I’m sorry, Clarisse.”

Gusto kong mohilak apan gipugngan ko ang akong kaugalingon.

“Dako ang akong pagtuo ug paglaom nga matinuod ang tanan. Pero nakigminyo kag laing babaye, Ramil.

Sakit kaayo nako ang wa mo pagtuman sa imong gipanumpa nako!”

“Nasayod ka sa tanan,, Clarisse.

Napugos lang ko sa pagpakasal niya tungod kay gihubog ko niya sa iyang ‘birthday party’ maong dunay nahitabo namo.”

Miginhawa kog sagunson. Tinuod ang gisulti ni Ramil.

“Naminyo ka man sab sa laing lalaki, Clarisse!”

“Oo pero pinugos kay wa ko mahigugma niya.”

“Parehas tang duha, Clarisse. Naminyo ta nga wa tay gugma sa tagsa-tagsa nato ka partner.”

“Di na nato sila hisgotan, Ramil. Pulos na sila patay tungod sa lain-laing sakit.”

“Parehas nga wa tay anak nila, Clarisse.”

Nahilom ming duha. Naglantaw mi sa lawod.

Morag duna mi gitugkad sa tagsa-tagsa namo ka pagbati. Dugay-dugay gyud nga ang kinanaas sa mga bawod nga mohapak sa kilid sa ‘seawall’ ang mipatigbabaw.

“May luna pa ba ko sa imong kasingkasing, Clarisse?”

Nagkatinutokay na sab kami.

“Ako, Ramil, duna pa bay luna sa imong kasingkasing?”

Dugay ming nagkatinutokay. Nabatyagan ko ang kainit sa palad ni Ramil nga mipisil sa akong palad.

Hinay ko nga mibawos sa pagpisil sa iyang palad.Sa unang higayon sa among panagkita karon, nagpahiyomay kami.

Unya namiya kami sa ‘seawall’ nga nagkuptanay sa mga kamot. Hugot ang paghawiday namo sa usag usa.

(KATAPUSAN)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph