EMELIA FAJARDO BONTILAO
253 D. Jakosalem St., Brgy. Zapatera, Cebu City
Si Gary private guard sa usa ka panimalay samtang si Jessa maoy sinaligan sa tanang buluhaton sulod sa balay. Usa ka adlaw nagsultianay sila si Jessa ug Gary.
“Gary, gikapoy na ko sa kadaghang buluhaton sulod sa balay. Gusto kong mopauli na sa Bohol pero pwedi bang tabangan ko nimo pagpangitag laing kasudlan nga trabaho? Tawagi lang unya ko.”
Tuod man nipauli si Jessa sa Bohol ug pagpanglabay sa mga adlaw gitawagan siya ni Gary.
“Jess, duna koy kaila nga nangita og katabang. Balik na diri sa Cebu.”
Nisanong si Jessa. Nagsabot sila si Gary sa barko ug sa oras nga idunggo sa barko sa Cebu gikan sa Bohol. Pag-abot ni Jessa sa pier anaa na si Gary naghulat kaniya. Wala sila maglangan, nanakay sila og taxi. Didto sila mosangko sa usa ka balay. Gituktok ni Gary ang pultahan. Wala magdugay may nibukas sa sira sa pultahan. Usa ka hamtong nga babaye.
“Uy, maayong buntag ninyong duha,” matod sa babaye. “Gary, mao na ba ni ang imong giingon nga imong ikapuyo dinhi?”
Nahasiga ang mga mata ni Jessa sa iyang nadungog. Dako ang iyang pagtuo nga trabaho ang iyang gibalikan sa Cebu. Gipugos pagpasulod ni Gary si Jessa sa kuwarto. Giingnan ni Gary si Jessa nga magtipon na sila og puyo. Dako ang kahingangha ni Jessa kay ngano gud tawong magtipon sila nga dili man sila uyab?
Nipadayag si Gary nga dako kaayo siya og gusto kang Jessa ug nahigugma siya sa babaye.
“Gary, trabaho ang akong gibalikan dinhi sa Cebu ug nganong makigtipon man ko sa tawo nga wala ko mahigugma?”
Nadala gyud sa pasalig ni Gary si Jessa ug nagtipon gyud sila. Nanglabay ang mga adlaw nimabdos si Jessa. Puno sa kalipay ang ilang pagpuyo. Apan wala damha ni Jessa nga inanay nga nausab si Gary. Tagdugay na kining mopauli ug inig-uli na hubog pa gyud. Kon iyang sukmatan tubagon lang siya nga nag-overtime kini.
Usa ka higayon niana iyang gipanid-an si Gary. Nasapnan niya kini sa usa ka imnanan ug adunay kaubang babaye.
“Pasayloa ko, Jessa, di na ko mousab.”
Nanglabay ang daghang katuigan hangtod nga niabot og upat ang ilang mga anak. Nisamot ang kalbaryo ni Jessa kay nagumon na sa bisyo si Gary. Sugal, inom, drugas, ug nisamot pa kalisod ang ilang kahimtang kay nabulit na sila pag-ayo sa utang. Magsige na lang sila og away hangtod nga aduna nay mga higayon nga kawaton ni Gary ang kuwartang tinagoan ni Jessa sa kuwarto. Igo na lang siya sa paghilak.
Niabot ang adlaw nga wala na gyud makaagwanta si Jessa. Nausa na ang iyang hukom. Mopauli na lang gyud siya sa Bohol. Adto na lang siya manginabuhi kauban ang iyang mga anak kay sa Cebu bug-at na kaayo ang krus nga iyang gipas-an.
“Gary, adto na lang ko manimuyo sa Bohol kauban ang atong mga anak. Maayo didto kay aduna koy mga igsuon nga makatabang-tabang namo sa inadlaw nga mga panginahanglanon.”
Nipauli si Jessa sa Bohol kauban ang iyang mga anak samtang si Gary nagpabilin sa Cebu kay anaa man siya nagtrabaho. Ang panagluon sa magtiayon kon dili na magkasinabtanay ilabi na kon magbisyo ang bana, wala gyuy maayong padulngan.