Maria Fatima
Sibonga, Cebu
He was asked to dilie, and he simply agreed, but just before his death, he suddenly felt an obsession with life. — Keikichi Nakahata
Dili man gyud diliay ka tinuod malipayon sa imong kinabuhi. Pero nganong lahi man ang gipamulong sa imong kaipon nga si Tsuneko dilihang nagkaabot mi sa Plaza Independencia pag miaging buwan?
Matod pa niya, “Wala koy masulting bati ni Yozo. Hapsay ang dagan sa among relasyon rong panahona. Parehas ming malipayon.”
Basin bag nagmaskara ka lang sa malipayon nga dagway. Lisod baya nang magpuyo sa pagpakaaron-ingnon kay sa panahon sa pag-inusara dili ka lung-an sa kamingaw ug kahadlok hangtod lamyon ka sa kangitngit. Nakahinumdom ka man tingali sa akong gisugilon nimo niadtong nag-abot ta sa usa ka bar sa Mango Avenue. Kadtong akong gisulti nga: Dili na ko ganahang moatubang og mga tawo ug maglisod ko'g pagpagawas sa akong gibati sa uban. Sa mubo nga pagkasulti, dili na ko ganahan mahimo'ng tawo. Kadtong panahon nga gikwestyon nako akong kaugalingon kon angay ba kong mopuyo dinhi sa kalibotan. Pwerti nakong pangapkap sa tubag kon unsay kwalipikasyon aning mahimong tawo apan ang solido'ng tubag mao lamang ang kapakyasan kay bisan karon wala gihapon ko masayod.
Managsama atong pangutana kay utro pud kang wala nasayod. "Mao pud baya na akong pangutana, Bay,” sa imong kalmadong tingog.
Kon mahimo dili na lang gyud kinahanglan pang sayran kon unsa man gani. Basin mao pa hinuon ni ang hinungdan nga maliso ning akong utok sa hingpit. Sayod na baya kang gamay na lang pud ang nagkupot niini.
Dako akong kahingangha sa akong nasayran nga nagkasinabot mong Tsuneko sa pag-ambak didto sa Marcelo Fernan Bridge. Ang inyong dagway maoy nahimong ulohan sa halos tanang mga pamantalaan dinha sa Sugbo lakip na pud sa kaulohan kay lagi lisod tuohan ning gihimo ninyong double suicide. Matawag bang malas kay buhi ka ug si Tsuneko ray nadayunan? Kinsa ba intawon ang magdahom nga inyo tong buhaton kay sa akong nasayran malipayon mong duha.
Makapangutana lang pud ko ba kon tinuod busog sa kalipay ang usa ka tawo gutomon pud ba kaha siya sa kamatayon? Mangandoy ba kaha gihapon siyang mamatay? Unya karong wala na si Tsuneko sa imong kiliran wala ko kabalo unsay akong ihinaot nimo. Kalipay? Lisod gyud nang dakpon, Bay Yozo. Ambot bag madakpan ba nang hinampaka kay idlas man kaayo. Ingon man gud sila nga naa ra kanunay ang kalipay nagpaabot. Akong ihinaot na lang guro nga madakpan unta nimo ang kalinaw sa umaabot.
Pero abi nimo nakahinumdom baya gihapon ko sa nahimo nimong tubag dihang gipangutana tikaw nga: “Para nimo unsa ning kalipay?” Dali ra kaayo kang nakatubag niining pangutanaha human mo gihinubig ang ang usa ka botelyang ilimnon.
“Ang pinakadako nga kalipay mao ang pagkahibalo sa tinubdan sa kasubo.” Hanoy ra kaayo nimong gilitok ang panultihon sa sikat nga nobelistang Ruso nga si Fyodor Dostoevsky. (KATAPUSAN)