Ning takna sa subong pamalandong akong nahanduraw ang usa ka talan-awon sa Herusalem. Gisubay ko ang masigpit ug batuon nga dalan nga nagtungas sa mahabog nga bungtod sa Golgota. Akong gipunting ang akong panan-aw sa yuta. Dinhi akong nakita ang tinulo sa daghang dugo nga mitina sa mahait nga mga bato. Human nako makita kining makahilap nga talan-awon naningod ako sa palibot. Dinhi akong nabati ang kaguliyang sa katawhan nga nagagikan sa halayong unahan. Mikara ako pagsusi kon unsay nahitabo.
Human molabay ang pipila ka mga gutlo akong nasaksihan ang usa ka mahinuklugong talan-awon. Akong nakita ang usa ka tawong makaluluoy nga nagpas-an sa mabug-at nga krus. Ang kalawasan niini natumog sa daghang dugo ug singot. Nag-udhak kini sa labihang kakutas ug nagdungoy sa labihang kakapoy ubos sa naglagiting nga kainit sa adlaw sa kuwaresma. Ang iyang mga ngabil nga nangliki sa labihang kauhaw nagkiwi sa kahapdos sa mga samad ug bun-og nga nakatata sa iyang kalawasan. Nagsusapinday kini sa tumang kaluya ug lugosay na makalakang. Matag karon ug unya mahisukamod kini. Ang mabug-at nga krus nga iyang gipas-an mahidakdak sa wala nay umoy Niyang kalawasan ug momugnag laing samad ug bun-og nga nakadugang sa giantos niyang kaluya. Apan inay nga kini kaluy-on ug sagakayon, gibunlot hinuon kini ug gipugos pagpatindog ug giduslak sa bangkaw aron mapugos sa paglakang.
Human mahilabay ang laing mga gutlo nahidangat na ang tawo sa taluktok sa kalbaryo. Gihuboan kini sa mga sundalo ug gilansang sa krus nga Iyang gipas-an taliwala sa singgit sa katawhan nga nagbiaybiay Kaniya. Sa dihang naghingutas na ang tawo sa kamatayon, nangayo kini og tubig apan ang suka nga sinagulan og apdo maoy gitingal Kaniya.
Si kinsa kining tawhana? Siya si Kristo nga atong manunubos. Siya ang hari sa mga hari nga miula sa iyang dugo ug mitugyan sa iyang kinabuhi aron paghaw-as kanato gikan sa kasal-anan nga atong gilusbogan. Siya ang tuboran sa gugma nga walay katapusan ug sumbanan sa katarong ug kaligdong. Diha sa mga pag-antos nga iyang nahiaguman gumikan kanato, ang uban tang kaigsuonan nagpadayon pagpatugbaw sa garbo sa naangkon nilang kaadunahan ug kahalangdon hinungdan nga misilaob ang mga palabilabi ug panaugdaog. Kadaghanan kanato miyatak sa hustisya ug nagpahimulos sa nahuptang gahom alang sa kaugalingong katagbawan.
Karon, panahon na sa pamalandong. Panahon na sa pagbasol ug paghinulsol sa atong mga sala. Mamalik na kita sa Diyos. Wad-on na nato ang pag-abusar sa gahom. Kamong mga tinugyanan sa balaod, ayaw gamita ang inyong armas sa dinautang paagi ingon pananglit sa pagpamusil niadtong mga gikatahapang nalambigit sa druga nga bisan wala mopakitag pagsukol, pusilon lang dayon. Samtang kadtong mga adunay ikasarang nagpadayon paghanggap sa hangin sa kaugalingnan o kagawasan.
O, sagupon ta ang mga pagtulun-an nga gibilin ni Kristo. Tumanon ta ang tanan niyang kasugoan kay kini mao ang dalan sa katumanan sa atong mga damgo pagkab-ot sa kalinaw ug kahusay.