LAMBERTO G. CEBALLOS
Sitio Panaghiusa, Basak-San Nicolas, Cebu City
SULOD sa kuwarto ni Loisa nagpadayon pagtuyok-tuyok sa hilom ang electric fan. Naghigda si Mariz sa kama nga nagkamison lang, nagtan-aw kang Loisa nga naghukas sa iyang padyama. Nahulma ang bugdo sa dughan niini sa gisul-ob nga sando. Midulog si Loisa kang Mariz. Mitunog ang orasan nga diha sa headboard sa kama. Alas diyes na sa gabii.
Ganina ra silang nahiabot gikan nga nanan-aw sa salidang Para sa Hopeless Romantic nga gibituonan nilang Nadine Lustre ug James Reid didto sa Cinema 2 sa SM City-Cebu. Didto sa sinehan kaganiha may gibutyag si Mariz bahin sa ilang relasyon.
“Nakahukom ko, Darling, nga putlon na nato kining atong relasyon,” matod ni Mariz nga giagbayan ni Loisa didto sa ilang gilingkuran sa balcony sa sinehan.
“Buot mong ipasabot, Darling, nga magbuwag ta?” ni Loisa nga milugak sa iyang pag-agbay sa abaga ni Mariz. “Ngano man? Wa na ka mahigugma nako?”
Nabati ni Mariz ang kalit nga pagtaas sa tingog ni Loisa bisan kini pinugngan tungod sa kaikog sa mananan-aw duol nila ug basig mahimutang sila sa usa ka eskandulosong sitawasyon.
“Sabta ko, Darling,” hagawhaw ni Mariz, daw nagpakiluoy.
“Adto ta sa akong apartment mopadayon pag-discuss ana!” mibawos paghagawhaw si Loisa.
KARON naghigda na si Loisa sa kama tupad kang Mariz. Gipaunlan ni Loisa ang ulo ni Mariz sa iyang wala nga bukton samtang ang tuo diha sa tiyan sa naulahi.
“Final na nang imong desisyon, Darling, nga putlon na nato ang atong relasyon? Duha na baya ka tuig nga uyab ta!” matod ni Loisa nga migakos kang Mariz.
“Oo, Darling,” ni Mariz nga mitan-aw sa kabayuong nawong ni Loisa ubos sa unawop nga kahayag gikan sa bombilya sa poste sa gawas sa apartment nga milusot sa nagkang-a nga bintana sa lawak. “Mura man gu'g way ayo ang sangpotan niini sa atong mga kinabuhi. Sa gidugayon sa atong relasyon nakasinati ko'g kahaw-ang sa akong kinabuhi nga wala nimo kahulipi. Hinaot nga masabtan mo ako.”
Miyanguyango si Loisa samtang luhagan ang usa ka kamot nga mihapuhap sa lawas ni Mariz kinsa wala motukol sa gibuhat sa lesbian niyang uyab.
“But you know I love you so much! And you said you love me, too!” ni Loisa nga mihalok sa aping ni Mariz. “Nganong makigbuwag ka man? Di ba malipayon ka man uban nako?”
“Malipayon, pero kuwang. Dunay kuwang, Darling, aron mahingpit akong kalipay!” ni Mariz nga mipugong sa kamot ni Loisa diha sa iyang tiyan. “Lahi ang akong bation kon kauban ko si Manolo. I love him so much!”
“Nakasabot ko bahin anang imong gisulti,” ni Loisa nga mipadagan sa iyang kamot ngadto sa pus-on ni Mariz. Unya gidumol niya ang iyang mga ngabil sa mga ngabil ni Mariz. “Pero wa nimo hunahunaa kon unsa ang epekto ngari nako kon magbuwag ta. Mahimong maghikog ko, o di ba may patyon kong tawo.”
“Kalma lang, Darling,” ni Mariz nga milunga sa halok ni Loisa. “Kining pagputol ko sa atong relasyon dili mao ang katapusan sa kalibotan. I know you can find someone to replace me, or perhaps, tingalig may lalaki nga mabihag sa imong kaanyag ug imong madiskubrehan nga usa diay ikaw ka tinuod nga babaye.”
“That’s impossible,” ni Loisa kansang kamot milahos na sa ubos sa pus-on ni Mariz. “Sa nadalagita na ko, wa gyud ko kamatikod nga naibog kog lalaki. Ang akong naibgan, kadtong anak nga dalaga sa among silingang maestro, si Liza Marie.”
“Pero panahon na nga putlon nato kining atong relasyon, darling. Si Manolo misakna na nga magpakasal mi!” ni Mariz.
“Okey, kon maoy gusto mo,” ni Loisa. “Can I do it for the last time?”
Igo lang miyango si Mariz. Ug nabatyagan niya nga giumod ni Loisa ang nawong niini ubos sa iyang tiyan.
(KATAPUSAN)